「宅男女神」陳瀅曾經同賭王四房何猷亨打得火熱，四太仲派晒定心丸咁明示陳瀅有望嫁入豪門。不過感情話變就變，今日有報道就話猷亨兩個月前已飛甩陳瀅，原因係嚟自破碎家庭嘅陳瀅，想快啲組織家庭，不斷向猷亨逼婚，結果逼得太緊，猷亨去咗台灣開工，而陳瀅就單拖飛咗去加拿大探外婆。

女神有空檔，有心人搵到位梗係上啦，報道指同陳瀅一齊拍劇嘅張振朗，就睇準呢個機會，同陳瀅假戲真做，買早餐食宵決樣樣齊，媾女傳聞自然通晒天。

今日陳瀅就透過經理人公司回覆《蘋果》，話呢段傳聞唔係真，仲隔空向張振朗派好人卡：「我同張振朗係《全職沒女》同事，同佢係劇入面飾演情侶，同佢有最多對手戲，未埋位所以就去咗附近餐廳食少少嘢。我覺得佢份人係好gentlemen同好拍檔。」

咁猷亨呢？陳瀅冇否認兩人分隔兩地，仲繼續話兩人都係工作至上：「我嘅感情事，就唔係好似報道一樣咁講，只係想低調啲。可能因為我少提到感情令大家有咁嘅揣測，而現時我兩個都處於工作搏殺期，大家都係成年人，有共識專注工作。」

正如陳瀅咁講，佢真係好少提感情事，仲話o依家最重要嘅係屋企人而唔係感情：「我o依家喺加拿大探緊屋企人，婆婆身體都有少少好轉，我覺得現時最重要嘅係屋企人，最後多謝大家關心！」