當年今日
關於我們

隔牆有耳:
單方面開記招講細節 
阿Man皇上擂台戰各有各打 - 李八方

蘋果日報 2015/04/25 00:00


八方之前先話「忠義民團」發言人阿Man(石房有)同熱血公民黃洋達隻揪騷單嘢,俾皇上話阿Man縮沙,隨時打唔成,點知話口未完,阿Man話搞掂喇,仲單方面宣佈與黃洋達的拳賽細節,呢次輪到辣㷫皇上,除拒絕出席、發律師信之外,仲自己搞場擂台戰,隨時變成各有各打。
話說阿Man噚日喺拳道會拳賽記者會入面,幫黃洋達預留「吉椅」(圖),單方面宣佈同皇上拳賽細節,話拳道會喺9月3日拳賽日騰出空檔畀佢同皇上比賽,賽事由富德拳館創辦人江富德作公證人。江富德話體育運動並無政治立場,亦唔介意有人上台為運動而拼搏,強調在公平前提下「只係個見證人」。
empty
皇后鬧爆出律師信
但皇上就話成單嘢佢乜都唔知,佢皇后陳秀慧喺阿Man嘅facebook上載一封信嘅圖片,鬧阿Man單方面辦記者會,有借皇上之名為其他拳賽宣傳之嫌,要求對方發聲明澄清,仲出埋律師信,強調皇上冇承諾會出席噚日記者會。
皇上亦唔係省油燈,佢話已經訂咗了6月7日(周日) 喺九龍灣國際展貿中心匯星Star Hall嘅場地,當晚就會搞拳賽,話會即場準備定律師,擺定擂台,只要阿Man肯嚟就即場打,而忠義民團亦毋須畀任何費用。𠵱家阿Man有一場擂台,皇上又有一場,但各自又似乎唔肯打對方嗰場,唔通自己同自己打?

李八方
mailto:[email protected]