在港度過漫長的策騎生涯後，資深騎師柏寶仍然想在綠茵場上尋求突破。

柏寶是兩屆墨爾本冠軍騎師（99/00及00/01馬季），佢日前返到澳洲維省，並剛周一（3日）於費明頓馬場參加試閘。

之後柏寶去咗悉尼，再於剛周二（4日）朝早操馬，務求盡早進入狀態，以參加星期六（8日）的玫瑰崗馬場賽事。

柏寶表示十分期待於澳洲繼續策騎事業，暫時未為自己設定任何目標。

他說：「我返嚟並唔係只為賺錢。其實我有其他的生意事業，而且都發展得好好，但我仍然好想繼續騎馬，好想同其他騎師較量之餘，亦想贏多啲頭馬。我會繼續努力，因為仍然好有雄心壯志。」

雖然在港策騎了15年，但柏寶期間曾多次返澳洲客串，並交到好成績，當中包括於12年憑「翠月」攻下墨爾本盃，同埋10年憑「水晶百合」捧走金拖鞋大賽冠軍。

他謂：「我有段長時間冇在澳洲策騎，但現時真係好期待。我諗都會帶俾我好多新鮮感，同埋會令我更渴望取得成功，我亦會盡力建立與這邊馬圈人士的關係。」

「我好享受同練馬師合作，我都好欣賞佢哋，並好鍾意見到年輕馬參賽同成長，而幫助佢哋不斷學習同進步。我現時冇特別追求一啲目標，但會好享受策騎的樂趣，從中再嘗試睇吓有咩可能性出現。」