【本報訊】康宏理財（1019）四月入股第一信用財務（8215），染指借貸業務，康宏主席王利民表示，集團一直有意擴大借貸業務，「雖然唔係即時交換雙方客戶嘅database，但至少係多咗個途徑去開拓新嘅客源，遲啲睇情況會做埋樓按。」

王利民接受訪問時透露，康宏一直以來都有借貸部門，「畀佢哋用嚟做投資，但規模其實好細，𠵱家同第一信用合作，主要係睇中對方在借貸領域上嘅經驗以及規模，來長遠發展借貸業務。」康宏以1,780萬元入股第一信用，目前持股量約16.67%，是第二大股東。王利民表示雙方合作要一步一步慢慢來，要仔細分析雙方客戶的需要，「未去到可以即刻交換雙方database嘅地步，但係交接上一定有幫助，畀到雙方唔同嘅服務需要。」他強調集團早期投資需要用的資金已使得七七八八，今年會預留1億元用作借貸業務，惟暫時未定下業務指標以及盈利貢獻時間表。
康宏於2月取得內地保險代理牌照，成為香港首間進軍內地保險代理業公司，王利民表示要將香港的投資觀念及服務帶到內地，「內地人第一句就問你呢個產品有幾多回報，但就唔理風險，近期好多內地理財產品出事，但我哋肯定唔會有問題，因公司唔會sell自己唔熟識的產品。」
對於外資公司普遍在內地出現「水土不服」的人際關係問題，尤其涉足金融保險業務，王利民認為公司應對方法就是做到「順眼」，「就算肖鋼唔做中銀監主席，對大家影響唔大，因為大方向政策定咗，邊個上位都一樣，康宏只要做到對住邊個都順眼，咁就冇人唔鍾意你啦！」康宏目前在北京、深圳、成都、廣州、四川、江西及南京設有分行，今年暫未有擴充計劃。