貓狗都係人類最好嘅好朋友，日本溫情電影《貓咪去哪兒》、《狗狗沒有家》將定7月初同時喺香港上映，兩片嘅部份收益仲會捐向流浪貓狗機構NPV（非牟利獸醫服務協會），睇戲幫流浪貓狗，對鍾情小動物嘅愛心港人而言真係一舉兩得。

山本透執導嘅《貓咪去哪兒》係真實故事改編，主角杉作光男原本係以世界冠軍為目標嘅拳擊手，但因為在比賽上視網膜受傷，被迫放棄拳擊之路。經歷過人生低潮，杉作最後在兩隻小貓嘅感化下成了漫畫家，佢筆下漫畫系列《為什麼貓都叫不來》，就係描寫佢同「小黑」、「細細粒」呢對貓兄妹嘅相遇到別離。漫畫推出後大受歡迎，共售超過35萬冊，拍成真人版電影由風間俊介、鶴野剛士同松岡茉優合演。

至於《狗狗沒有家》就由動物紀錄片導演山田茜執導，由小林聰美飾演擔任電視製作人嘅女主角，喺2011年發生311地震後，目睹被選棄在福島核電廠附近嘅貓狗，還有被送到收容所面臨安樂死嘅狗狗，令佢深受打擊，而採訪過程，令佢認識到好多充滿愛心嘅熱心人士。導演山田茜曾拍攝過多部與動物有關嘅紀錄片包括《小六的幸福》、《和1000隻貓咪共寢的女子》等。六年前，山田茜心愛嘅金毛尋回犬重病過世，曾想放下一切到國外進修，當時佢獲前輩名導澀谷昶子鼓勵：「不要沉溺於悲傷，要把悲傷化為力量，去拍以狗狗為主角的電影吧！」於是山田茜開始拍攝動物片。日本311大地震之後，山田茜導演輯錄過去四年、累積超過200個小時嘅畫面，剪接成紀錄片《小六的幸福》，描繪從日本福島核電廠20公里境內被救出來嘅狗狗「小六」，電視播出後獲得頗大迴響。