葉熙祺(AK)、吳千語今日喺深圳出席何國鉦DorianHo2013秋冬時裝騷，葉熙祺換咗三條裙示人，以透視「北半球」Look最為噴血，騷盡其32B上圍。而千語BB就壓軸——零性感出場。

對於同郭富城傳出緋聞，葉熙祺就話著得咁性感，唔使問對方，自己同意就得。至於問到佢同城城嘅關係，葉熙祺就表示大家係朋友關係，而且識咗好耐。

奇在既然識咗好耐，但早前先至爆出，話葉熙祺上過城城屋企，仲逗留咗30個鐘。問葉熙祺係咪真？佢就儍笑回應： 「其實嗰日去搵一個香港朋友，唔知佢住喺邊。」 咁即係有冇焚城30小時啫？佢話： 「我都唔知點解咁寫，都係去一個香港朋友屋企，但嗰個唔係佢。」 至於問到係咪張智霖介紹，佢就話： 「冇呢回事，但同Chilam識，因為合作電影。」

葉熙祺就話全屋好多人都係城城fans，細個媽咪都有聽佢啲歌。47歲嘅郭富城大過23歲葉熙祺24年，有指佢哋係父女戀，葉熙祺就話 ：「我又冇咁諗，男仔成熟啲好，唔似後生仔，辛苦努力得番嚟嘅嘢唔珍惜。」

葉熙祺又話，自己好崇拜、好欣賞城城，不過好少聯絡，只係好似朋友之間咁聯絡，仲話其實自己係好自愛：「係有聯絡，佢嚇咗一跳，我都係，我呢世人冇可能做小三或小四，總之問心無愧。」