韓版《步步驚心》男星姜河那前晚親民抵台，噚晚同今日會喺台北ATT SHOW BOX舉辦兩場粉絲見面會，不過根據台灣傳媒報道，姜河那今次見面會銷情就唔多理想，兩天各千門票都賣不到五成，雖然票房咁差，但姜河那都相當專業，喺台上落力演出。

姜河那開場就獻唱韓劇《天使之眼》嘅主題曲《留給我的三件事》登場，並露出招牌笑容，以普通話同大家打招呼：「大家好，我是姜河那，我愛你們。」

姜河那話自己都有睇台灣電影《我的少女時代》及《不能說的秘密》，所以對台灣印象深刻，更崇拜周杰倫喺《不》片中嘅琴技，直呼：「片中單手彈鋼琴嘅畫面很帥，下次我也要試試！」姜河那自爆自己好叻撒嬌，但現場大家起哄要佢撒嬌時，佢又搞笑扮嬲，令粉絲尖聲四起。

之後佢又同粉絲十指緊扣，點知粉絲覺得太幸福，當場喊起來，搞到姜河那即為粉絲抺淚，又自言遇到女生喊嘅話都唔知道應該點做。到喺現場玩揀理想型時間，佢要求粉絲站起來，唔合格就要坐返低，由於現場亦有男粉絲，姜河那即搞氣氛話：「男生我拒絕，男生舒服咁坐喺椅上就好，腳會酸嘛，唔想參加就唔好勉強。」最後佢揀出短髮、有瀏海、冇戴眼鏡、雙眼皮、穿褲子及笑起來嘴巴大等特徵嘅女粉絲。

談到台灣美食，佢自爆前晚食咗鼎泰豐、牛肉麵，有朋友推薦佢食臭豆腐，佢都好想試，聽到台下粉絲大喊鳳梨酥，佢即興奮話：「I like it！」並將粉絲送贈嘅鳳梨酥緊緊抱實，唔捨得放手，咁可愛舉動即時冧暈台迷。