【地產專題】擁有MBA學歷並於跨國超市工作的陳先生，2011年因工作關係賣樓移民，當時持有大角嘴奧運站凱帆軒兩房戶以575萬元沽出，該單位今日市值831萬至864萬元，升幅近五成。陳先生兩年前因工作關係回流香港，坦言：「落錯車囉，𠵱家含住淚上返車！」

年約40歲的陳先生2008年已上車，以約364萬元買入凱帆軒兩房戶，2011年以575萬元沽出。他解釋因工作關係，需長駐海外，「2011年打算移民，當時想試吓外國生活，最後覺得香港真係一個好地方，比其他地方好，我哋更加要珍惜，唔會有第二個」。

如今，陳先生因工作回流香港，回想當初賣樓移民，他坦言：「落錯車囉，現在咪含住淚上返車！」中銀及滙豐網上物業估價，當年他沽出單位估值分別為831萬及864萬元，較當年買入價分別升值45%及50%。

斥1,600萬元買雲滙

陳先生表示想長住香港，「返嚟香港後租住何文田單位，逢周末揸車去科學園放狗，覺得環境幾好」。去年3月遂以逾1,600萬元買入雲滙三房戶，實用面積857方呎，支付一半首期。

不過，逆權運動去年中爆發，陳先生一生買賣物業總像不在好時機，「冇後悔。現在回流，每用一蚊都係一張投票，例如你食乜舖頭睇乜媒體，諗吓啲錢點用，去幫手。我唔排除工作原因，兩、三年後公司要我返美國，當然呢啲超越個人決定」。然而去年底至今，武肺、股災，全球經濟前景未明，今次是否上錯車？「我比較好彩，屬低價買入，可以囉。樓，始終要住，睇長啲囉！暫時睇，最近發生好多事，影響最大係疫情；如果疫情減退，睇返基本情況，目前政府咁低能量，係咪真係搵到地呢？每日不斷有新移民來港，住邊呢？供不應求仍然解決唔到。除非政府有措施，用比較公正嘅手法提供土地，到時我先考慮賣樓，但暫時未見情況會逆轉」。