阿董真係唔止上神枱,而係引咎辭職(或者挾功升職為國家領導人),真相經已百分之九十九點九大白!
壽爺出招,打到特區嘅低層次劣質政治勢力倒瀉籮蟹!聲稱要會見審查特首候選人嘅民建聯目瞪口呆,講開支持唐唐嘅田少話佢好「愕然」,而一干民主派人物重好笑,竟然同陳鑑林合流,話阿董做得民望幾好,齊齊挽留㖭!
阿董飛咗去北京,無精打采咁話:佢做政協,經過與中央磋商,辭職問題,「適當時候」會公開交代!
凡係了解共產黨嘅都知,交代,即是犯咗罪要坦白嗰隻,正所謂「要老老實實向人民交代」,阿董想幾時講嘢,想講乜嘢,分分鐘自己都揸唔到主意,要由壽爺具體指示,做特首做到咁,形同經已遭受「雙規」,真係情何以堪咯陰功!