快活谷今晚（28日）用最窄的C加3跑道作賽，1檔馬開場後一直落敗捱打，去到第八場三班1200米，終由高伯新馬房「新威龍」配楊明綸食出尾糊，幫1檔馬打破全晚盲門，此駒單Win及組合獨贏A3分別派197及37.5元。

四歲馬「新威龍」初配楊明綸爆冷開齋，鞍上人食白果個多月後（對上一Win是5月21日「勝利導航」），終於破悶局贏馬，亦令這晚最後三場都由華人騎師勝出，順序黃皓楠「平天下」、吳嘉晉「馬克羅斯」及楊明綸「新威龍」，開出萬三蚊華將三寶。

高伯新去咗英國度假兼買馬，今晚仲未見人，由佢馬房訓練的「新威龍」對上兩場用雷神都熱門落第。呢鋪雷神唔騎初配楊明綸，早段留住跑守七八位，末段左穿右插從中內叠殺出重圍，影相氣走外叠後追馬「駿明珍寶」，贏短馬頭位。

楊明綸早於6月11日沙田日馬騎「勝利日」墮馬受傷，6月14日谷草夜賽缺陣，6月18日傷癒復出，今晚食尾糊可算苦盡甘來。

第八場爆到七彩，二至四名由熱門「駿明珍寶」，以及一對冷馬「多多勁驥」及「好好佳駒」順序瓜分，四重彩派117萬幾。騎師王方面，潘頓整晚埋單中三元完場，另加兩亞一季，個人累積52分勝出騎師王。