當年今日
關於我們

隔牆有耳:危城士多搵命搏 - 李八方

蘋果日報 2007/05/04 00:00


澳門五一勞動節遊行,抽水哥「一炮」而紅搞到澳門街立立亂,不過位於衝突現場附近橫街土地廟前地街嘅新源士多,卻無懼外頭兵荒馬亂,幾乎全條街舖頭都落閘避免殃及池魚,呢間士多老闆蘇生蘇太如常開門做生意,搵錢至上。
新源士多離開槍現場約半個街口,蘇太話遊行隊伍未殺到嚟時,佢抱住得九個月大蘇蝦女行出街口八卦,見到好多警察警車嚴陣以待,「我喺澳門大,都未見過咁大陣仗。」見勢色唔對路,佢返入士多,「一陣沙塵滾滾,殺錯良民咪弊!」

賣晒百幾支水

到下晝5點鐘左右,遊行人士操到嚟,大街拆天咁嘈,蘇生話好多舖頭拉閘,佢反而好老定,「驚咩!唔係好亂啫。」遊行人士行到身水身汗,又嗌到口亁,大家走入橫街買嘢飲解渴,「佢哋十支八支咁掃,又猛鬧差佬。」後來警方出動胡椒噴霧,中招者摸上門買水洗眼,「我哋開舖,都救番唔少人㗎。」蘇生話同一條街有幾間士多,街頭巷尾便利店、超市林立,生意惡做,平日下晝頂多賣幾支水,五一嗰日竟然賣咗百幾支水,存貨沽清所以話做生意都係要搏先搵到錢,「搵多幾百蚊啫,唔算發橫財。」