一屋二主九天使愛到眼淚標

蘋果日報 2005/05/21 00:00

50日大的西摩BB真係得意到飛天，不過全部都未有名，留番畀新主人改。
狗仔交配唔出奇，奇就奇在呢對西摩夫婦同人類夫婦一樣，有性有愛！老公Unko真係當正MouMou係老婆咁錫，有嘢食讓佢食先，出街遇到MouMou被狗𠝹，Unko會挺身而出「唬」到佢驚。50日前呢對狗夫婦重生咗9隻狗BB，難得全部健康，生還率100%！全靠主人Wilson同太太由接生到餵奶全程24小時輪班照顧，狗與狗、人與狗之間，一樣充滿愛。

記者：馬慶武
攝影：林栢鈞
通宵守候天使降臨
狗仔生BB基本上唔使人幫，亦識得自己咬斷BB條臍帶，不過Wilson同太太就全程陪住MouMou，一來怕佢會唔小心壓死剛出世的BB，二來想MouMou得到心靈上的支持。由晚上10:45pm開始，生產過程長達9個鐘到第二朝7:45am，Wilson通宵陪伴，要餵MouMou飲水之餘重要留意狗仔的狀況，到最後一隻BB出世後，唔只MouMou攰到攤喺地唔識郁，兩位主人都眼瞓得好緊要。「不過見到佢哋9隻都咁健康，睇住佢哋食奶個可愛樣，辛苦都值得的。」Wilson話今次係3歲大MouMou的第二胎，為咗MouMou健康着想，唔會再畀佢生第三胎喇。
empty
■一家大細全部都得過獎，所以所有狗BB都附有一張國際認可的出世紙，盡顯靚狗身份。
empty
■狗媽媽MouMou好鍾意同BB玩，不過亦好善忘，第一胎時啲狗仔走晒後第一日會四圍搵仔，過多兩日已經唔記得咗。
empty
■狗爸爸Unko就好冷淡，仔仔行埋過嚟撩佢玩，佢就「唬唬」想嚇走佢哋。
empty
■Unko作勢咬BB，不過血濃於水，咬唔落口，玩吓啫！
empty
■Unko、MouMou兩公婆好恩愛，雖然Unko超鍾意食嘢，但見到MouMou都會讓佢食先，老婆大晒！
男人老狗：走一隻喊一次
爸爸Unko（4歲）、媽媽MouMou（3歲）、第一胎留低的哥哥Sky（歲半）、重有最老的史納莎（7歲），一屋4狗啱啱夠地方用。所以Wilson話呢胎5女4男西摩BB會賣畀人收養。「之前嗰胎生咗6隻，淨係留低Sky一隻，其他都係畀咗人養。」
問Wilson捨唔捨得，Wilson重面露尷尬之色：「雖然只係養咗幾十日，但都好唔捨得！男人老狗都係咁話，真係走一隻喊一次㗎！」9隻BB其中4隻已經有人認咗頭，剩番嗰幾隻就等緊新主人。（查詢：82077500）
empty
■西摩本身屬工作犬類別，所以三母子服從性都好高。
揀狗貼士：西摩最靚欖核眼
Unko同MouMou都係香港狗會的永久冠軍狗，而Sky就喺上年攞過本地繁殖西摩冠軍及工作犬冠軍，成家都咁威水。Wilson話：「揀西摩狗仔首先要睇佢對眼，欖核形就最靚，兩隻耳仔要細對同埋唔好分得太開，嘴就要短，咁就係靚樣喇。身體方面，毛要夠厚，四肢要粗壯，尾部的毛就要呈掃把狀。」不過Wilson話呢啲都只係比賽標準，如果只係自己養，冇諗住參加比賽，應該從性格方面埋手，「狗仔活潑啲、狗女聽話啲，一句到尾合眼緣最緊要。」
empty
■Wilson重有一招養狗秘技，就係日日餵食魚油丸，可以令毛髮亮澤，更厚更靚。
empty
■眼仔呈欖核形係最靚，而且西摩狗係有眼睫毛㗎，好特別！
empty
■嘴要夠短，不過狗BB未定形，全部個嘴都好短。
empty
■耳仔分得太開或者太大隻都唔算靚，不過如果自己養就無所謂，覺得得意可愛就已經冇問題。
九反地帶
empty
逼你埋牆～
史納莎叔叔Popye因為體形差唔多，西摩BB最鍾意同佢玩。
empty
救命呀～
Popye被狗BB包圍，惟有跳上主人身上求救。
empty
又眼瞓㖭～
呢隻狗BB叫「豬油糕」，因為佢唔係食就瞓，肥嘟嘟特別可愛。
empty
放監時間
西摩BB最理想係喺三個月大前搵到新主人，服從性會好啲，對狗或主人來講都係好事。
empty
玩到濕身
個樣懵盛盛，其實好奇心好強，四圍捐搵新嘢玩。拍照當日捐咗入廚房玩水，玩到成身濕晒。
empty
我咬咬咬
勁活潑曳到爆，見人就衝埋去又撞又咬！不過唔使怕，狗BB淨係鍾意咬人條褲，而且咬人都唔痛㗎。
empty
鐵窗雄淚
狗BB重未聽教，鍾意隨地大小便，主人要間開一間房專畀佢哋用，方便清潔，所以先拍到「鐵窗雄淚」呢一幕！