經緯紡織（350）呢期陰乾回落，最啱睇位陰滋滋收貨。今年祖國取消紡織品配額制，市場期待紡織品上家股仔會有賓虛場面，但因為宏調及中美貿易壁壘問題落空，造紡織機嘅經緯，亦受到影響，好似去年所接18億元（人民幣．下同）定單，原本今年交貨，但其中6億銀因宏調效應，客仔暫時擱置。但要咁睇，定單雖然暫時擺埋一邊，但亦反映到市場需求。又今年頭，宏調效應紓緩，經緯隨即新增近5億元定單，相信問題一過，遲早釋放暫時壓到實一實嘅龐大需求。
再講，經緯NAV4蚊，現價折讓55%，手頭現金9.36億港元，資產同現金底厚，再假設05年度（12月止）仍要反映部份負面因素，純利無變，仍舊7倍PE，以呢個PE水位，迎接潛在龐大需求，會非常吸引，股價再跌，近1年低位1.67元至1.6元，抗跌力加強，收集冇有怕，一個turnaround，隨時又係回報半番以上貨式。

一拖伺機搭順風車

一拖（038）啱啱對上星期五成交兩球，異於經緯，但股有股格，一拖適合短打。又講兩點，報載一拖今年首季農業裝備機械產品供不應求，銷量有雙位數增長，兼加價1%至2%。睇往績，農業產品包括拖拉機及收穫機佔一拖七成業務比重，就算加價幅度遭鋼價原料升幅抵銷，一拖因為生意做大咗，05年度中期（06月止）應該有睇頭。第二，上年好多大孖沙捧一拖場，增持成本價見兩蚊樓上，可惜一拖04年業績唔對辦，形成間唔中有炒高派發現象。呢勻一拖又跌近一季低位，若然呢個趨勢持續，可以伺機搭轉順風車。
錢雋