《超級巨聲2》出身、入行將近10年嘅陳國峰（Penny），今日喺尖沙嘴舉行首個個人記招，宣佈4月初喺旺角麥花臣場館處男開騷，一班好兄弟吳業坤、謝東閔、林盛斌、梁競徽（前名：梁烈唯）、范振鋒同王梓軒等撐場，並即席寫揮春為Penny打氣。Penny坦言開記招已經心情緊張，促成今次開騷源自佢上《流行經典50年》做嘉賓後，身邊搞製作嘅朋友就提議為佢開騷。

入行至今主力拍劇及主持工作，Penny表示早已冇諗唱歌機會，殊不知機會突然出現，佢話：「我由細到大都好鍾意郭富城，好想練一part勁歌熱舞向偶像致敬，亦會唱自己4首代表作嘅兒歌。」Penny透露有嘗試邀請郭富城擔任嘉賓，但城城太忙未能到場。至於會否騷肌，Penny笑言：「如果觀眾要求，都可以除一除。」

經已答應擔任嘉賓嘅坤哥，形容當年入行Penny有如哥哥咁照顧自己，今天兩人已情同兄弟，希望到時可以喺台上，佢哋兩個加埋謝東閔可以產生更多化學作用。問到坤哥會唔會跟Penny一齊除衫？佢話：「我留番自己個騷先，佢身形好正，我係男人都垂涎三尺。」坤哥又計劃帶同自己演唱會門票於當晚發售，吸納Penny觀眾。

精選娛聞，喺晒《娛果》
http://fb.com/appledailyent