內地自由行嚟香港必到莎莎掃貨，帶挈莎莎國際（178）去年度賺多咗兩成幾，主席郭少明喺噚日業績記者會上面話，呢排股市波動對佢哋生意只有輕微影響，至於過去兩日港股係咁升，佢好開心話：「股市越好，零售業就越好，顧客買嘢都鬆手啲。」
不過零售業面對最大嘅難題始終係租金，郭少明話，今年續約嘅店舖，業主要加兩成半租，不過佢好有信心，炒股自由行好快旺到嚟香港，到時股市好，零售業自然好；零售業好，莎莎業績自然更加好，加租？濕碎啦！
講完生意經，華華問佢暑假有冇陪寶貝仔去旅行，廿四孝老竇郭少明話，同阿仔去馬爾代夫玩咗5日。嗰度水清沙幼，華華諗佢哋兩仔爺一定齊齊玩潛水，點知郭生話：「冇呀，我年紀大。」所以只係睇住阿仔潛，不過佢補番句：「嗰度真係好靚，下次去都係要學潛水。」