【新增岑子杰及鍾健平回應】
民主黨立法會議員鄺俊宇今早於天水圍遇襲，其頸椎受重擊，已送往天水圍醫院治理。事實上，民主派人士遇襲事件屢見不鮮，如於原定8.31民陣集會前夕，民陣召集人岑子杰與友人於佐敦受襲；同日「光復元朗」遊行發起人鍾健平亦於接受傳媒訪問期間，被4名南亞裔男子以鐵通及雨傘襲擊手臂及背部。

「光復上水」遊行申請人、北區水貨關注組召集人「金金大師」梁金成於上月中旬，亦曾在沙田第一城被數名男子伏擊，以藤條類的物體打傷，施襲者更警告他不要再「搞事」。以他所知，警方現時仍未就其案件拘捕任何人，「其實除咗岑子杰嗰單，有邊次襲擊事件有拉到人嘅啫？」為了預防再次受襲，他坦言外出時會多留意有否被跟蹤，「唔會透露咁多行蹤畀人知」，又呼籲「有名有姓」的前線人士，出外要有友人相伴，家中亦宜安裝閉路電視，「你知淋紅油嗰啲都會有」。

對於鄺受襲，他形容鄺在反送中示威活動中一直保持和平理性，「佢唔係衝擊嗰班，又無挑釁過警方，只係好希望政府回應我哋嗰五大訴求……連咁嘅人都受襲，係咪有班人專登同林鄭叫大家『冷靜啲』所吹嘅風對著幹？」，又指施襲者全程攝錄，或屬「境外勢力」所為，「係咪呢班人要將段片交畀其他人睇，證實自己做咗，而嗰啲人係接觸唔到香港身份嘅呢？」

被問到會否與9月28日或10月1日的集會有關，他不願猜測，但認為假如施襲者在集會前行動是相當愚蠢，「呢啲咁嘅敏感時間，唔好話9.28，咁近10月1日，佢哋嘅國慶，你仲要做呢啲嘢，其實係咪變相想令啲民情更加洶湧？」梁認為一連串的襲擊事件，代表行動者希望攻擊運動中較「標誌性」的人物，令他們的支持者不敢再發聲，但這些行為絕不會令港人卻步，「由我受襲之後到咁多人受襲，大家都堅定咁出嚟，係因為不公不義嘅事不斷地發生」。

鍾健平接受《蘋果》查詢，指自己8月下旬遇襲後仍未完全康復，右手其中一隻手指更未能發力，有機會造成永久創傷，「所以而家未養好傷都好少出街，同埋帶定啲防禦工具喺身」。他遇襲後曾接受傳媒訪問稱自己不會報案，將自行調查案件。現時他對施襲者的身份已有頭緒，但暫時不便透露對方身份。

他認為鄺俊宇遇襲與近日的「私了」文化有關，「而家通常我哋做乜佢哋（施襲者）就做乜，私了唔在乎打得有幾傷，係關嗰種侮辱事……我見有拍低埋過程，可能係回應緊呢樣嘢」。不過，他形容施襲者在美國即將審議《香港人權及民主法案》前夕襲擊鄺俊宇是「非常愚蠢」，「一個書生，仲係一個拎到咁多票嘅立法會議員」，或更有利法案通過。

鍾亦認為襲擊事件與9.28或10.1示威活動或許有關，但未能評估會否因而激起示威人數上升，「可能無LONO（不反對通知書）人數又會少啲，或者就算所謂大台講咗喺金鐘，大家都係走去尖沙嘴、太子」。鍾受襲當日，民陣召集人岑子杰亦受襲，他坦言擔心一日多宗的襲擊事件會再次重演，如是者或令示威人數激增。

岑子杰與友人亦同於8月下旬遇襲，警察公共關係科高級警司江永祥於本月初的警方記者會上表示，就事件至少拘捕兩名中國籍男子，年齡分別為15歲及44歲，涉嫌「串謀襲擊」、「無牌駕駛」、「沒有第三者保險駕駛」及「虛假文書」等罪。岑指，據知事發一周後就拘捕疑犯，「感覺都有認真辦案同仔細調查」，但就不知道疑犯的背景，亦未有提堂的資料。他受襲後亦的確有加以警剔，「會盡量唔好行巷仔，去啲有CCTV（閉路電視）嘅地方」，早前外出亦有帶備行山枴杖，但認為始終防不勝防，「有心人裝無心人，其實避唔到」。

對於再有民主派人士受襲，他指自己與鄺同樣是「和理非深入骨髓」之人，假如和理非者都被襲，變相是鼓勵示威者私了，「當有藍絲加入，而警方又差別執法，黃絲就惟有自衛，過程中同藍絲嘅衝突越嚟越升級，然後就變成所謂嘅『私了』」。岑不擔心這些襲擊事件會令港人對示威運動卻步，「如果覺得香港人會因為咁而驚，其實好唔貼近2019年嘅政治氣氛……而家見到香港發生咗咁多，無諗過會發生嘅事，但大家都無卻步過」，反而擔心會令私了氣氛更濃烈，「希望親建制嘅人去諗一諗，其實用呢種高壓方式去製造混亂，去解決香港嘅問題，其實對呢個運動於事無補，對成個香港都於事無補」。

-----------------------------

9.28五周年集會

日期：9月28日（星期六）
時間：晚上7時至9時
地點：添馬公園
註︰不反對通知書申請中

主辦︰民間人權陣線
-----------------------------

10.1國殤遊行

日期：10月1日（星期二）
時間：下午2時
地點：維園集合起步往遮打道
註︰不反對通知書申請中

主辦︰民間人權陣線
-----------------------------
【撐學生】
召集有心人 撐學生全年睇《蘋果》
立即按此
-----------------------------
百日特刊記載香港人逆權之路
《逆權百日》
《自由之夏》
-----------------------------
《囚牢之疆》 專頁
揭開集中營邪惡面紗
今日新疆 明日香港