時下嘅人無時無刻都變咗低頭族，成日望住個電話。前日前有個人喺倫敦搭地鐵時因為冇做低頭族，而發現咗奧斯卡金像影帝艾迪烈柏尼（EddieRedmayne）都喺車箱！當時係繁忙時間，艾迪同老婆就好似普通人咁一齊逼地鐵。呢個發現艾迪嘅人兄話當時冇人問艾迪索合照，冇人去騷擾佢，因為大家都唔相信堂堂大明星會去逼地鐵。

其實艾迪住咗倫敦好多年，時不時都會搭地鐵，之前都被人影過相。唔少外國明星都被發現過平民地搭地鐵，包括有安妮夏菲維（AnneHathaway）、「美國隊長」基斯伊雲斯（ChrisEvans）、班尼狄甘巴貝治（BenedictCumberbatch）、Rihanna、Jay-Z以及好慳家嘅奇洛李維斯（KeanuReeves）。