卓韻芝同梁子賢今晚喺中環外國記者會舉行婚禮，兩人見傳媒時有啲尷尬，受訪時老公要先行退場，阿芝一個人受訪。

講到晚宴主題，阿芝先係講咗句「我老公…」但即刻尷尬笑，佢話係第一次咁叫老公：「咁大個女都未試過咁叫人，我老公設計張帖係綠色，今晚都係綠色做主題，Because Love is Green。綠色係愛啦，係和平，環保同舒服，除咗花之外，我哋今晚都用咗好多植物佈置。」

問到合照時老公怕醜，咁喺會場入面老公係咪差唔多表現？阿芝話佢自己都有呢個情況：「其實我仲緊張，以為有咁多台上經驗好簡單，但一講嘢就喊，一片空白。」咁愛的宣言講咗咩？佢話：「真係講咗好多嘢，真係一片空白，我都唔記得，但有多謝婆婆啦，有多謝YT（俞琤）。」

阿芝又話婆婆佢好搞笑，未輪到佢講嘢已經不停講「我好開心呀」，仲發現咗婆婆呢幾日都有偷偷地練簽名。喺傳媒發相中見到一張婆婆打緊牌，阿芝話係幾日前食飯時影，仲話婆婆掛住打牌，唔記得要斟茶，但我一叫佢就行得好快。

而Sammi笑佢係「新娘鬆散」，阿芝都認，仲話班妹妹係佛系姊妹。講到幾時生BB？阿芝話：「我冇諗咁多嘢，我嚟緊做騷，老公又要做電影工作，蜜月都要遲啲。」

姊妹團之一嘅GiGi，約喺9點半由老公接走，離開前佢話要趕返屋企黐窗，又向記者請教，係咪要黐「米」字先穩陣。

精選娛聞，喺晒《娛果》
http://fb.com/appledailyent