萌爆嘅「美心妹妹」楊鎧凝（Celine）早前因為推出寫真集《童萌時光》，畀巿民投訴當中有意識不良畀照片被迫下架，呢單寫真風波仲未劃上句號。

平日曝光唔停嘅Celine突然低調，本周二佢啱啱過咗7歲牛一，嗰晚佢個facebook忽然活躍番，仲貼咗佢抿起嘴切生日蛋糕相，見到fans狂like，Celine個fb跟住幾日又有update，有貼玩狗，又有貼朋友送佢美少女戰士立體蛋糕，壽星女食得好滋味。

畢竟Celine只係7歲小妹妹，仲係單純，對錢概念唔高，佢未必知自己係小金蛋，雜誌踢爆出道3年嘅佢狂接job吸金300萬，所有騷錢梗係由媽咪保管。

Celine個fb噚日貼咗佢玩魔術短片，佢將手中硬幣變走，呢個時間玩變錢魔術，好敏感啫。呢條片一出，花生友有讚有彈，有人讚佢「好打耳」、「叻叻豬」，網民仲話叫Celine教佢點樣變，不過，亦有網民繼續鬧爆，仲揶揄Celine媽：「新梅媽（梅艷芳媽媽）果然將人意見當係吹風。」

Celine自爆出寫真風波，即使係暑假，有時間出席公開宣傳活動，但幾乎全部叫停，見財化水，本來聽日有個活動係Celine孖男神王宗堯一齊跳企鵝舞，但主辦單位發通告話Celine有私人理由嚟唔到，要由第二代美心妹妹Keicy（胡梓盈）頂上。