50歲郭富城早排自爆戀淘寶嫩模方媛(Moka)後,亦唔介意喺微博貼出同女友Moka嘅合照,愛得纏綿。
今年係佢哋二人第一個聖誕,就算再忙,城城都抽出時間去陪Moka。大陸傳媒「全民星探」就爆料,話城城近日喺上海拍攝《永不消逝的電波》,原來安排咗女友過嚟一齊歡度佳節。當日佢接女友上車,跟手城城就同戴住口罩嘅Moka,去咗一間餐廳食飯撐枱腳,開頭兩個人不時顧住睇電話,城城仲喺女友面前毫無避忌擘大個口撩牙,之後仲要隔住空氣嚟嗰煙韌咀嘴。
佢哋食完飯就轉場去咗一間咖啡店,女方就撩城城玩selfie,城城都好受落,同女友嘟起個嘴扮錫錫,之後城城主動出擊同女友嚟個十指緊扣,拖手喺街頭漫步,以為佢哋只係行吓,點知原來城城早有安排,包場同女友睇戲《萬萬沒想到》——陳柏霖、楊子珊、馬天宇主演。奇幻片種。網民嘅影評都係……er……
即係咁,內地報道稱城城出到「包場」呢招,真係冧死女呀。不過,其實嚴格嚟講都唔算包場,因為有狗仔陪佢哋睇戲,兼夾影晒呢pair小情人溫馨場面。只見Moka全程依偎喺城城膊頭,睇完戲食埋糖水到凌晨三點,女方從後攬實城城,一齊返咗城城下榻嘅酒店,甜蜜宿一宵。