俾CY過橋抽板嘅前政協尖啤劉夢熊，最近就接受咗本報專訪。擅玩財技嘅佢，仲用有泡沫嘅「概念股」嚟形容林鄭，到底點解呢？聽阿尖啤講，概念股個精髓就在於冇實質資產、冇盈利模式，只係得個概念。套返落林鄭度，就即係表面上好似好打得，一碰到《逃犯條例》修訂就原形畢露咁話喎。

777只得概念冇人買

不過話分兩頭，八方都知股票呢家嘢，注資就可以重生，尖啤就咁答：「佢廢㗎喇，唔係跌到幾多問題，資本市場最重要嘅一樣嘢就係信心。冇信心就冇人買，唯一可以做嘅就係停牌、落台。」

咦！咁喺尖啤心目中恩將仇報嘅CY，又點計先？尖啤諗都唔諗，就狠插CY就好似一隻停牌股咁，冇資產，冇新業務注入，已經交易所勒令停牌，等緊取消上市地位。佢更抵死潤CY話，唔少長期停牌說服唔到聯交所同證監會復牌嘅股票，不外乎係交唔到財務報表（冇政績）、財務出現問題（冇誠信）、資產不足（能力低）、股東爭拗（撕裂社會）、公眾持股量低（專制、民意極低）。尖啤仲話，CY冇得連任，日日數《蘋果日報》廣告好無聊，簡直係廢人一個，一定係18個月之內執骨嘅股票㖭呀！