香港人旅行成癮，奈何公務纏身，偶爾去去鄰近的日本、台灣散心仍可以，但要遠征美洲、非洲又豈是易事？唯有收看旅遊Vlog（Video Blog，影片網誌）望梅止渴。初代YouTuber Ming仔（梁嘉銘）近兩年正正主力拍此類旅遊Vlog，市傳其每月收入一度高達25萬元，實行邊玩邊賺，最近更一圓電影夢，羨煞不少打工仔！

Ming仔近期憑藉《非南非旅》等旅遊系列再次爆紅，令不少網民直呼「好想同Ming仔瘋狂去旅行」。不過，原來他本身並不特別喜歡去旅行，「通常都係阿媽或者朋友去，咪跟埋去。」直至兩年獲客戶贊助拍攝旅遊短片，孰料一試就愛上，更愈拍愈狂熱，自發去拍不同旅遊系列。

自兩年前首次衝出亞洲後，Ming仔足跡已踏遍南美、南非、印尼及歐洲等十多個國家。他坦言，「如果唔需要喺香港做野，可以將所有工作搬到線上，我就會考慮去啲無去過既地方……我諗呢一兩年我都有起碼四分一至三分一時間唔係香港。」

不少網民大讚Ming仔拍攝的Vlog夠真實，一問之下，方知背後大有學問，原來他最多要同時兼顧4至5部攝影機的拍攝。「其中A機係主機，用來拍自己，要有wide angle（廣角角度）；另外有部機補啲b row shot（輔助鏡頭），嗰部機要有得zoom（放大縮小），通常會放喺腰間。第3部機係傻瓜機，通常係set低用來拍timelapse（縮時拍攝），另外如果有運動性質嘅野就可能需要go pro。」他笑言，有一次去馬丘比丘待上4日3夜，即使帶了5部攝影機亦不夠用，無奈之下連手機也要出動。

雖然設備繁多，但他堅持一機一鏡，寧願多帶幾部機：「因為一啲緊要嘅moment一瞬即逝，我換唔切鏡，要好似西部牛仔咁，如果唔係隻動物就跑走咗。我係要長期ready住，所以我嘥唔起換鏡嘅時間。」除了要隨時做好拍攝準備外，每次去到新地方，他亦要心中有底，思考要如何通過鏡頭呈現該地的特色。

但他笑指，拍攝工作不難，難在後製。「拍嘅時候我係不負責任地拍，用唔用到我都roll機，拍埋好多返嚟，我後期先決定點樣用、點樣剪。」以南非系列為例，雖然一集只有短短二十多分鐘，但當時他拍了足足2TB的影片容量，要如何取捨?「最主要我揀咗我對鏡頭講野果部分先，然後再疊啲b row上去，（剪片時）以呢個為做軸心。」

Ming仔初投YouTube界，即以《今日freestyle》系列成名，看似一帆風順的背後，原來他亦試過零收入，「最差果個月可以係無㗎、係零㗎，都可以係負㗎。因為我付出咗時間但零收入嘛。」從加拿大回流時手上只有數千港元，又欠缺人脈，他曾試過做文員，日做8小時，全天候掃描及影印文件。「我知道呢份工淨係為咗搵錢，當有一個製作既機會比到我嘅時候，同呢份工有衝突我一定會辭職。」後來他接到一份主持人工作，不久便開始上傳影片到YouTube，展開YouTuber之路。

7年以來見盡YouTube市場的轉變，競爭日益增大，不少同期YouTuber早已淡出，但Ming仔指，他從來未試過有好迷惘的感覺。「因為我目標好清晰，就係做電影。中間有苦悶、唔受歡迎、啲人唔鍾意、無咩突破，自己搵方法去行返正軌。」由他首次執導的電影《生化藥師》近日上映，總算一嘗電影夢。但他表示，自己的目標尚未達成，「我對九十年代喜劇好鍾情，好想拍到咁嘅野出黎，呢個係我嘅目標。」

記者：溫婉婷
攝記：邱仲權
剪接：李倩婷

蘋果財經，關心你飯碗
http://fb.com/appledailyatm