早前4個警察協會喺旺角警察體育遊樂會舉行撐7警「集會」，警察隊員佐級協會主席陳祖光透露「一班社會上嘅正義朋友」會設立「敬言仁」基金支持7警（新聞連結： http://bit.ly/2lMRxzX ）。

向太陳嵐今日喺銅鑼灣代表演藝界人士，合共籌得777萬元交予協助七警嘅敬言仁基金，當中捐款人士包括周焯華、向華強、方逸華和陳國強各捐100萬；楊受成、李國興、林小明、曹貴子各捐50萬；王晶捐30萬；曾志偉、蕭定一、羅守耀、國藝娛樂文化集團有限公司各捐20萬；李寶安及林建名各捐10萬；最大一筆捐款額，嚟自「向太陳嵐全球粉絲」，合共捐出477,777玩，令整筆捐款數字與「7」字有緣，合共籌得$777萬。

向太負責遞交支票儀式，之後接受傳媒訪問，透露自己一早想發起募捐行動，佢話：「我係微博想發起好耐，咁啱有人成立咗呢個基金（敬言仁基金），一周內已經開晒銀行戶口，我哋梗係響應！希望報道出咗之後，會有更多人響應，全力去支持。」

今日籌款額係$7,777,777，向太話其實呢個運動有好多人捐錢，包括佢全球嘅fans，有人捐10蚊、100蚊咁，佢話自己只係一個召集人。身旁嘅洪祖星就指向太全力支持，大家都會響應，洪祖星又透露影協、影片商會、製片業協會都有支持，呢三個商會代表咗香港9成半香港電影嘅出版，所以都有捐錢支持向太呢個行動。向太又補充，除咗7警，另外仲有好多受佔中影響嘅警員，希望呢個基金可以幫到所有因為佔中而生活受影響嘅警員。

撐警支票由陳亨利代為接受，問到總數籌到幾多，敬言仁基金負責人話：「日日有同事計緊，約2,000萬，好難講實數，因為一路收緊，我哋冇為基金籌款定目標，因為冇上限，希望港人頂力支持。」

777萬捐贈人：
太陽城娛樂公司周焯華先生：100萬
中國星娛樂集團向華強先生：100萬
方逸華小姐：100萬
陳國強先生：100萬
英皇娛樂集團楊受成先生：50萬
美亞娛樂李國興先生：50萬
寰宇娛樂有限公司林小明先生：50萬
中國手遊曹貴子先生：50萬
向太陳嵐全球紛絲：$477,777
王晶先生：30萬
曾志偉先生：20萬
蕭定一先生：20萬
羅守耀先生：20萬
國藝娛樂文化集團有限公司：20萬
李寶安先生：10萬
大名娛樂有限公司林建名先生：10萬