一方有難，八方支援，講嘅唔係地震、海嘯等天災，而係一班喺蘋果公司（Apple Inc.）返工，成日俾人笑做「藍精靈」嘅香港分店員工。香港學生上街爭取民主選舉，受特區政府以催淚彈打壓，近千個「藍精靈」噚日睇唔過眼，要求公司行政總裁庫克（Tim Cook）撐香港。
數以萬計莘莘學子日前喺金鐘、中環示威，爭取特首真普選，被警察以催淚彈、胡椒噴霧驅散。成千個蘋果香港員工，雖然無參加大罷工，但噚日唔少戴住黃絲帶、手帶返工，仲自發寫咗封聯署信，諗住寄畀身處美國嘅大老闆庫克，希望佢關注香港情況。
封信指，香港人正爭取緊應有嘅人權及民主，但受到中央政府暴力對待。作為蘋果員工，希望庫克、以及一直以人道及受人尊敬（the most humanised and the most respectful company）見稱嘅蘋果公司，能夠支持同聲援香港公民抗命運動。

唔少網民對「藍精靈」另眼相看，讚佢哋「唔理Tim Cook點回應，至少班藍精靈肯出力」，仲有人話如果庫克肯回應，會即刻過檔用iPhone。不過亦有網民潑冷水，話iPhone代工工廠、即係富士康喺晒大陸，蘋果公司「睬你都傻」。
姑勿論蘋果最後回唔回應香港嘅「藍精靈」，員工肯主動發聲，已經證明咗唔係個個做零售業嘅，都對佔中行動嗤之以鼻，甚至開口大罵！

李華華
mailto:[email protected]