迷戀商台DJ鄧慧妍(麻利)嘅27歲陳姓的士司機,上周一晚喺九龍城茶餐廳打傷商台三個男DJ,當中包括甩骹兼穿頭嘅唐劍康(當奴),陳姓的士司機最後連人帶車失蹤44小時後被捕,而休息咗一星期嘅麻利噚日正式復工仲同傳媒見面,着住民族裙嘅麻利睇嚟精神奕奕。
麻利話案件已進入司法程序,所以唔方便講太多。問佢𠵱家仲會唔會好驚?佢話:「唔驚喇!因為知道佢喺邊度,𠵱家有相熟司機車我。」
雖然已經唔再驚,但麻利諗番件事仲有心寒感覺,又話初初怕講出嚟冇人理,後來知道好多人有相同經歷。佢話:「有事真係要講出嚟,唔可以自己啃晒,之前會驚人哋覺得自己唔係高,又唔係好受歡迎同生得靚,但其實呢啲事係冇原因,好多謝同事之前陪我同信任。」
今次當奴遇襲受傷,麻利坦言感到難受,覺得累咗其他人,因為大家都好無辜。問佢有冇叫公司加強保安?麻利就讚保安已經好好,佢每次離開電台都會幫佢先睇睇有冇可疑車輛。麻利又笑話𠵱家自己一個人去食雲吞麵,都俾同事話佢大膽,佢笑說:「我都要回復正常生活。」