最近甩轆甩到笑嘅亞視執到奧運最矚目賽事嘅播映權——劉翔跑110米跨欄決賽，真係掟壽包都掩蓋唔到嗰種興奮。為隆重其事，老闆王征同製作總監蔡錦豐仲飛咗去倫敦，親身感受吓現場氣氛都無可厚非，但點解要將片段放喺黃金時段節目《微播天下》度播呢？唔通亞視縮皮到要好似《精裝追女仔2》嘅老周電視台咁，要老闆出嚟做節目？
前晚播出嘅《微播天下》，其中一環節叫「大王小蔡睇倫奧」，冇錯，就係食「王」征同「蔡」錦豐兩字而成。佢兩個化身成漫畫公仔，只見王征着住福爾摩斯裝，拎住個放大鏡，鬼鬼祟祟偷蕃薯咁款；而蔡總就一身底衫睡褲look，高舉左手一齊shout阿努亞洲嘅姿態。

片段入面，蔡總玩龍心條橋，揸住個cam自拍，仲tune埋龍心嘅「douunderstand」腔，伸晒脷咁對住鏡頭，好有癡漢feel。冇幾耐就見到王征入鏡，原來佢哋去咗中國之家開幕日，同中國奧運會主席劉鵬見面，烚熟嘅王征重重複複咁講「民族英雄、民族英雄」，可惜劉鵬都唔多理佢囉！《微播天下》上周平均收視一點，唔知有老闆助陣，會唔會暴升100%呢？