藝人想人氣急升，其實有好多方法，睇吓你想揀邊種，好似2016同已婚裕美搞婚外情，最後背負第三者之名嘅黃子恆，前年就因為呢單新聞「一炮而紅」，而當年除咗佢，仲誕生咗另一位「賤男」，佢就係現年39歲嘅李潤庭喇！

本來係《東張西望》主持嘅李潤庭，一直係余詠珊愛將，因為有機會做呢個節目嘅主播，令佢成功「入屋」喺觀眾心目中留下正面形象。可惜佢前年被爆背結婚五年空姐老婆Crystal，偷食同樣有老公兼生咗兩個小朋友嘅Tiffany（新聞連結： https://bit.ly/2QAoT7M ）兩人被影到兩人親密攬啜錫之同時，李潤庭又不時喺社交網上載同老婆嘅相片晒恩愛，最終成為網民眼中嘅「賤男」。

其實，李潤庭同黃子恆一樣，爆出負面新聞後，大台都畀咗機會佢翻身，停工三個月可以復工。雖然解凍後，唔再可以坐喺廠，嘆住冷氣咁做節目，要downgrade出去跑新聞，但都叫有得做，可惜佢一錯再錯，一邊話要努力同老婆箍煲，好誠懇對住傳媒講：「老婆仍未搬返屋企，我希望用時間去補救，令佢可以睇到我的誠意，我今年的生日願望是希望氹番佢！」但原來同Tiffany從未斬纜，再被影到同Tiffany喺租住劏房私會，結果事業同婚姻一鋪清袋，就連一向好睇佢嘅余詠珊都唔再保佢，叫佢執包袱走人！

精選娛聞，喺晒《娛果》
http://fb.com/appledailyent