蘇民峰同麥玲玲都係近年人氣急升嘅堪輿學家，估唔到佢哋同樣新潮，日前各自各蒲吧，夜生活相當精采，只不過道不同不相為謀，二人去蒲都各據一方，蘇民峰拖女友蒲中環，麥玲玲就單拖夜蒲跑馬地。
蘇民峰嘅性格一向比較cool，我行我素，年前佢已經同麥玲玲傳不和，又話對方同佢唔同級數，點知麥玲玲今年初喺無綫節目《人傑地靈》中發生睇錯羅庚瘀事，狀態確有多少跌watt，不過上星期五晚，身穿粉藍色套裝嘅麥玲玲獨自夜蒲跑馬地都相當好笑容，見佢邊行邊煲電話粥，講得投入時，仲行吓又停吓，笑得好鬼開心，跟住就行咗入夜店CORNER消遣。

拖實女友

同晚凌晨兩點幾，麥玲玲嘅死敵蘇民峰就着住蝴蝶tee，同身穿黑色背心裙嘅女朋友十指緊扣夜蒲蘭桂坊，佢哋仲連踩兩場，先蒲Dragon-i再去Volar，身為老蘭蒲精嘅蘇民峰雖然飲到有啲貓貓哋，雙眼瞇成一線，但依然同女友齊齊穿梭老蘭街頭，尤其落斜行去Volar時，帶頭行嘅蘇民峰一直拖實女友，睇嚟佢飲醉之後，都識得開自動導航系統，功力真係有番咁上下！