傅嘉莉(Kelly)和陳自瑤(YoYo)今日喺鑽石山荷里活廣場出席遙控車宣傳活動。近日在劇集《特技人》中，Kelly被朱晨麗一幕性感谷胸演出搶盡風頭，就連劇中丸丸（李君妍飾）都好性感，佢話：「我都有笑譚俊彥，場戲係講佢夢見朱晨麗，我啲戲都難拍㗎，大家都好專業，要滿足劇情唔容易，加上個廠好凍，為角色配合都好辛苦。」而見到丸丸被好多網民讚，Kelly都希望大家欣賞對方之餘，同時都話唔介意性感拍劇：「我願意拍但去唔到呢個效果，見到朱晨麗都好靚，係健康性感。」

今日見到遙控車場面，令Kelly勾起童年回憶，佢話：「以前細個都會跟哥哥同朋友去鬥車，一嘗揸車慾望，所以踏入18歲立刻去考車牌，一次過合格，現實中唔會揸大膽車，反而近日電視劇裏面演出就有好多高速駕駛鏡頭，希望第日可以接拍一啲危險場面角色，如着火吊威也等。」

陳自瑤就話天生對器械都比較差，尤其揸車，所以平時出入返工湊小朋友返學都係call車多，雖然有車牌但好少喺香港揸車，佢話：「如果身邊有乘客同小朋友就更大壓力，幸好阿女返學係搭校車。」囡囡今年入讀小一，早前已經開學，並同老公王浩信一齊同囡囡返學，YoYo話：「有同囡囡一齊返適應班，阿女好開心，o依家安排佢入讀一間類似國際學校小學，輕鬆教學模式上堂，又包含傳統教學，唔想個女唔識中文，兩方面都兼顧會好啲。」

YoYo指現階段不會減少工作做全職媽咪：「間學校好自主，考試時間係突擊，冇得溫書，所以要平時留心上堂，家長係冇可能幫到佢。」YoYo喺暑假除咗去外地公幹外，仲有同屋企人湊囡囡去日本親子旅行，雖然老公王浩信未有同行，但就明白爸爸因為工作不定時，所以冇唔開心。

精選娛聞，喺晒《娛果》
http://fb.com/appledailyent