雖然大火發生至今已九個月，但花園街一眾排檔檔主，對慘劇畫面依然歷歷在目，他們對當日的情景不願去回憶，有檔主直言自從大火後，不敢再踏足192至194號大廈：「有人話夜晚見過成身着火嘅人，就坐喺樓梯口，我真係上都唔敢上！」

記者日前重返花園街舊地，雖然依舊排檔臨立，但街道明顯較以前寬闊，兩旁的行人路亦沒有再擺放貨物，原本只夠三人肩貼肩走，現在已足夠四人輕鬆行。排檔與排檔之間，明顯地不再「檔貼檔」，有足夠空間供行人出入，而各個排檔的頂部亦重新更換，裝成可收集雨水的新鐵頂。
位於花園街194號對開，賣衣服的檔主枝姐說，大火後一切化為灰燼，貨物損失達20萬元。不過最令她心灰意冷的，是生意在大火後一落千丈。枝姐的排檔以前每日生意額可達8,000元，但如今每日只賺1,200元：「啲貨擺少咗成三分二，冇乜人幫襯！」
而售賣睡衣的陳太，亦嘆生意難做：「咁搞一搞冇咗好多錢，裝過電錶、電箱同個鐵頂又要7,000蚊，家仲限埋我哋個位，點做！」
《蘋果》記者