社會對女人從來不手軟,各種角色定型、枷鎖接踵而來,最要命算是「外貌、年齡」,什麼「女人梗係長髮飄飄靚啲啦,劉華都咁講」、「仲熟女?熟到爛喇」,連麥當娜表演時不慎跌一交都被扣上「話咗佢老啦」。不過,自己條路自己揀,與其爭拗,不如拿枷鎖開玩笑,44歲的陳淑莊(Tanya)就索性把「我咁嘅年紀」當口頭禪。
記者翁煜雄
邀約Tanya講「女人」,她劈頭第一句「我冇結婚冇生仔,冇乜好講喎」,其實她可談的多的是,如五年前區議會落敗後剪短髮,雨傘運動時更剃光頭。她說當時助理有點擔心,「長髮畀人覺得穩陣啲、女性啲。」但短髮後有路人走過來說「好襯喎」,「本來擔心短髮太戰鬥格,反而啲人覺得親切咗」。
她也可談旅行,「當年第一次一個人去旅行,啱啱分手」,跑去當時還沒legoland、infinitypool的新加坡,「覺得係disaster,悶到嘔」,但慢慢玩出個癮來,「唔使同隔離嗰個夾時間,鍾意去邊就去邊」,單拖去環球影城。之後,隻身旅行已成習慣,「咁嘅年紀,唔係期待艷遇個隻喇」,她去秘魯雖與相遇的各國人士有講有笑,但最關心還是當碰到原住民示威,「跑去支持埋一份囉」。
「豁咗出去㗎喇」,她正學習一個人生活,最近患病還作了「生命安排」,「要搵一兩個假期都肯嚟陪你嘅朋友,嗰次我同佢哋講定如果我兩日都唔退燒,送我入醫院」。她說懂一個人生活,才可以找真正伴侶,「唔係搵個人照顧你,而係政治理念相同、性格啱嘅」。
訪問當天她穿了套裙,男攝記禁不住讚「好靚喎」,她笑言「一定係平時太烏搲。咁嘅年紀少咗打扮喇。」又笑說母親已沒催婚,「我咁嘅年紀喇」。言若有憾,但談起年紀其實沒半絲欷歔,像是「我話咗自己先,睇你仲點話我」。
女明星成績斐然如張曼玉,媒體再誇其獲獎無數,也總愛加句註腳「但仍單身」,「但」字可圈可點。其實,婚姻只是一種選擇,並非成敗指標。曾稱「沒有普選不會結婚」的陳小姐笑言「我有積極爭取普選㗎」,說完不忘「鬼馬花旦」式輕輕握拳一揮。訪問當日,陽光普照,雲淡風輕,沒有青筋盡現的單身宣言,只有自在的獨白。