當年今日
關於我們

打機樂園:
XBOX刮碟疑雲教你三招防禦大法

蘋果日報 2002/03/13 00:00


要數近排Game界大事,非XBOX爆出DVDROM會刮花遊戲碟莫屬。估唔到日版XBOX推出唔夠一個月,最先出現問題並非軟件或系統兼容性上,而係DVDROM底盤,最後重要搞到停售同即時回收有問題XBOX,本來軟微雄心勃勃想在Game壇大展拳腳,點知出師不利,今次認真大鑊。
記者、攝影:徐影龍
遊戲碟邊出現花痕
XBOX刮碟問題在各大遊戲新聞組引起激烈討論,有人認為主要原因係DVDROM由大陸製造,又傳有問題XBOX佔10%貨源,更離譜係傳呢單料係競爭對手發放出嚟,總之眾說紛紜,搞到個個都唔敢買新機同新Game。為了解事件真相及對香港玩家帶嚟之影響,筆者訪問當中兩位受害嘅玩家。

微軟承認硬件有問題
XBOX刮花遊戲碟消息傳出後,在港日BBS及新聞組內迅速傳開,一眾買咗機嘅用家紛紛作出投訴。到三月七日,微軟在其官方網頁( http://xbox.jp)內正式承認XBOX設計有問題,不過就冇詳細講解問題所在,更冇透露邊批機會出事,不過就承諾會替客人更換有問題XBOX。點知前日(3月11日)台灣微軟向各大傳媒發布新聞稿,內容大致是微軟日本分公司只接獲極少數投訴電話,XBOX性能良好,直指外國傳媒報道失實,更冇任何回收XBOX打算。
筆者走訪旺角及黃金數間Game舖了解事件,大部分店員都認為問題最主要出喺DVDROM底盤,當放入遊戲後,碟邊底部有2至8mm會直接碰到DVD底盤,若不正當關機,便會出現DVDROM轉盤失速而導致刮碟情況出現。
香港用家無保障
問到各Game舖對客戶更換XBOX之安排,其中一位資深店員話:「微軟今次換機對象只限日本地區,香港用家想換機都幾麻煩,因為成部XBOX重4kg,淨運費都成七百幾蚊,重未計行政費用,我哋賣機只係賺得一、二百蚊,點幫客換?要個客畀呢筆錢更加冇可能,何況今次刮碟情況並非嚴重,基本上唔會影響到讀碟,所以到目前仍未有玩家要求我哋更換XBOX。」
防刮碟自保三招
既然部分XBOX出現問題,而香港又冇代理替玩家更換,玩家惟有自己動手做預防措施。今日就教大家三招預防刮碟情況再出現,不過唔包括網上流傳嘅喺DVDROM底盤貼雙面膠紙做法,第一係因為手工麻煩兼對位難,第二係雙面膠紙用得耐角位會蹺起,對遊戲碟形成更大損害。
第1招 正確放碟及關機
好多PS或DC用家,習慣將遊戲碟留係機內,到使用XBOX仍是如此。其實當一部遊戲機開及關機時,光碟盤轉速都會有所不同,尤其係關機狀態時按Eject掣取碟,好易出現刮碟情況。正確方法應在開機狀態放碟或取碟,放碟時盡量放喺中間,不要側埋一邊,唔好關機後留隻碟係機內。
第2招 貼上保護膠貼
可購買市面上電腦光碟專用保護貼,不過要注意貼時小心對齊邊緣位置,揀選貼紙時不要貪平,應盡量揀薄身貼紙,免致碟身過重造成讀碟出現問題。
第3招 防刮絨面貼紙
呢招較簡單,因為只需將絨面貼紙貼在XBOX的DVDROM底盤就得,唔使逐隻遊戲碟貼咁麻煩,對位亦不算太難,不過賣價稍貴。
受害者實錄
呢隻就係被有問題XBOX刮花嘅遊戲碟,碟邊呈細碎花痕(箭嘴示),基本上並非太明顯,要留心先發覺。