高鐵西九龍站開足4日，各大傳媒都連日狙擊客流量不足嘅問題。雖然一眾高層連日嚟都支吾以對，不過所謂「醜婦終需見家翁」，港鐵今日下午突然派車務營運主管「基哥」李聖基同埋商務總監楊美珍出嚟開記者會，公佈成績兼解話。車務總監劉天成、CEO梁國權同埋「OK馬」馬時亨無露面，據講留守war room。

向來係「關公專家」嘅港鐵，之前罕有唔安排記者採訪頭班車，搞到好多記者都要通宵排隊撲飛。唔知港鐵而家係咪想記者手下留情，定係突然良心發現，覺得突然開記者會唔係咁好，公關喺今日記者會前，向一眾傳媒大派「春水堂」珍珠奶茶，同埋茶餐廳「翠華」奶油豬。

八方望過，「春水堂」嘅飲品每杯差唔多成30蚊㗎，港鐵呢次都算幾落本㗎！

立會補選新聞，《蘋果》一網睇晒
http://bit.ly/appledaily1125