韓國女星朴秀珍雖然喺7月已經升呢做裴太，但佢就冇乖乖留喺屋企服侍老公裴勇俊，反而去完個蜜月旅行之後就即刻復工，係咁出騷搵銀。

噚日，朴秀珍又再現身首爾江南區出席代言服裝舉行嘅簽名活動，可能係做咗人老婆嘅關係要睇老公眼色啦，朴秀珍最近出嚟嘅時間都着得好密實，噚日就以黑色樽領上衣再加黑紅格仔長裙上陣，外面仲加多件黑色皮褸，完全將自己包到實一實，頂多畀人多睇到佢少少腳咋。

雖然身分唔同咗，但朴秀珍嘅親民性格一樣冇變，由出場開始全程笑笑口，咁sweet，難怪冧得掂俊哥。