當年今日
關於我們

戰國時代玩一夜情
馮仁昭四圍超:曼玉搞到偉仔㷫烚烚

蘋果日報 2002/12/20 00:00


馮仁昭前晚走咗去灣仔會展睇《英雄》,先唔好講部戲好唔好睇,戲中劍客李連杰向秦王陳道明講長空(甄子丹飾)同飛雪(張曼玉飾)曾有「一夜之情」,所以飛雪同殘劍(梁朝偉飾)三年冇講過嘢。哈!又估唔到喺戰國時代,啲人都識得講一夜之情,又幾in喎!

陳道明最好戲
如果純睇製作,《英雄》嘅大場面同攝影技巧,都可以睇到導演嘅功力,但個劇本可以再好啲。如果偉仔同曼玉段情再拍深入啲,戲味可能會重好,而章子怡個角色就可有可冇咯!
演員之中以陳道明做得最好。雖然部戲有不足之處,但馮仁昭覺得呢類大片始終值得一睇嘅。

徐子淇買乳貼壓驚
徐子淇噚日喺中環Q8出席浪琴表宣傳活動,佢着嘅低V衫由大會提供,佢話一着上身即刻嚇咗跳,話未着過咁性感嘅衫,所以即刻同媽咪一齊落街買乳貼。喺英國讀緊書嘅徐子淇趁聖誕檔期返香港搵外快,但佢話今次嘅行程緊迫,只係得二十五號嗰日可以陪吓屋企人。
萬綺雯選工姐好頭痛
萬綺雯噚日喺金鐘現代美容中心,為工展小姐嘅「最具活力小姐獎」做評判,最後由一號林惠轉奪得。
萬綺雯對於九位候選佳麗讚不絕口,佢話:「今次質素都好平均,重有幾個特別標青。不過今次工展小姐最重要梗係要睇吓佢哋夠唔夠活力,樣唔一定要好靚,所以做評判都好困難。」

黃品源以小齊為目標
黃品源噚日喺海逸酒店,宣布明年一月七號喺紅館舉行一場《黃品源簡單情歌演唱會》,重請咗譚詠麟、任賢齊同盧巧音做嘉賓,門票價錢亦同兩年前嘅個唱一樣,黃品源用國語話:「開演唱會不是為了賺錢,我的歌酬也沒有增加。」喺記者會上,司儀叫錯咗佢做小齊(任賢齊),佢話:「我的髮型像他嗎?我也希望像他一樣做到亞洲天王。」

董太請肥肥到禮賓府
董建華夫人日前同德育關注小組一班幹事,去演藝學院睇沈殿霞同陳潔靈等主演嘅舞台劇《麗花皇宮2003》,完場之後,董太去後台探班,重同肥肥嚟個擁抱㖭。噚日負責《麗》劇嘅公關公司,發新聞稿話董太認為此劇係香港文化藝術嘅代表作,希望劇中演員第日可以到禮賓府演出,重建議到內地巡迴表演。