唐英年說：「做男人就要有膊頭，做公職就要有腰骨，如果有違規建築，我就會認。」但唐英年你約道七號大宅明明就有僭建地下室都唔敢認，更左閃右避話間屋是家族擁有，丟空無人住，要查吓有冇僭建。你分明就是講大話，把公眾當成傻瓜。你所住的五號屋在七號屋隔籬，有否僭建地下室你會唔知？就算之前唔知，前天早上亦先去睇清楚才出來答記者吧！你連有僭建地下室都迴避不認，又怎會認錯？更遑論有膊頭、有腰骨！這句話由你把口講出來，變成大笑話！
去年記者明明問你五及七號屋有否僭建酒窖，你就死口話誤會以為問五號屋。就算如此，前天直接問你七號屋，你豈非一樣耍？一樣不肯認？你以為唔認就沒人知？你的虛偽就激發起抱打不平的人爆料，當天下午就向《蘋果》揭露真相。原來你間七號屋建足四年，還由你老婆親自督工僭建這個千呎地下室！間屋本由你跟老婆擁有，在你居所隔籬建足四年，這樣你也不知？《蘋果》記者還查到該大宅打樁特別深，這分明就是早有預謀要僭建！
你見件事不能再瞞下去，傍晚才急急腳致電商台補飛，表示七號屋有僭建雜物房！酒窖又好，雜物房又好，咁即是有僭建啦！為甚麼早上不承認呢？到晚上仍只是說掘深咗，仍沒有和盤托出，你給人逼一逼就認少少，以後還會有人信你？你何來有膊頭有腰骨呢？你為何不老老實實早上就承認僭建地下室、誠懇道歉、並邀請記者去參觀釋疑呢？

沙膽虹