本地樓市辣招生效前，內地一些早已把錢轉來了香港，急於買磚頭對數，卻不想勞師動眾、打草驚蛇，引來不必要關注的超級大款、隱形富豪，原來不少是透過搜房、Go Home等樓盤網站搵香港新樓盤，勤力的地產代理，假如日日有update一吓手上樓盤的最新資料，私人拍一些最新盤源最真實圖片景觀單位裝修，然後upload上網，不時有強國飛來蜢主動聯絡經紀查詢，由於買家對香港不熟悉，純粹急於入市，化資金為磚頭，促成機會相當高。
經紀仔有眼不識泰山，卻無端端促成幾億元交易，淨袋幾百萬元佣金，足見網絡之威力。

網購就是未來，連一向非常抗拒網購的白頭賓架太座，在髮型屋set個靚頭過新年，發現時下年輕人網購習慣已根深柢固，成班staff購自淘寶的衫褲鞋袋，加起來閒閒地幾十盒，小朋友即時試身，阿太問道如顏色和款跟網上有偏差怎算，小女孩竟回應，九十幾蚊一對鞋，穿完即棄都冇所謂啦！事實上，近年身邊不少連中、高產都加入網購行列，看來逛百貨公司這類活動好快會變成集體回憶。
有統計指，買回來後因不喜歡或尺碼有誤而又費事再退貨更換的網購消費品，原來wastage達30%。許多消費者只是想滿足購物慾望，淘寶提供了方便滿足購物慾的平台，變相鼓勵消費，間接鼓吹浪費。只是，所有成功的，尤其是內地的internet company，成功竅門就在user-friendly。
Tesla落戶中國，不透過分銷店營銷，因為銷售的不止是車，而是既有錢又環保的一種新經濟動物身份標籤，車價跟美國一樣，不二價，稅費由買家自理。
重點係沒有確實交付運日期，訂了一架Tesla Model S，仲要唔知幾時交車，淨係講出來都已經好威，成功捉得到買家心理就係叻。

胡孟青
獨立股評人