馬浚偉聲稱和紅酒商女友許慧玲拍拖7年分手又復合，近年兩人感情已葡萄成熟，已屆38歲的馬仔正密謀籌備婚事。前日他接受本報訪問承認明年有結婚打算，並會在港註冊和擺酒，他又讚女友獨立、懂體諒人又冇公主病，三招降服他這個潮州怒漢。

馬浚偉向來緋聞極少，早年傳他和前經理人Frankie斷背，又跟蔡少芬和郭羨妮先後傳緋聞，但自與商人女友許慧玲（Vivian）拍拖後，兩人雖曾分手又復合，卻反令感情越趨穩定。今年3月馬仔曾拖女友出席劇集宣傳活動，早前郭羨妮更踢爆他快將結婚，馬仔前日揚言的確準備娶老婆，計劃明年拉埋天窗。

年尾買樓組新家

前日馬仔在將軍澳接受本報訪問，被問到結婚一事時說：「會係呢一、兩年嘅事，我認為發展同經濟去到一個安全線，咁咪開始生活另一頁囉。」是否明年結婚？他笑說：「有咁諗，確實日子未定，但要儲嚿錢搵地方先。家我同爹哋家姐住，希望第日我同太太買個近近哋嘅單位，年尾樓市會跌價，到時再睇囉。」做紅酒生意的Vivian和馬仔葡萄成熟時結婚，馬仔大笑：「年份要揀囉，存多一段時間就飲得。」

讚女友冇公主病

馬仔表示婚期落實後會公開，屆時必定宴請TVB同事，他說：「我喺香港大，會喺香港註冊同埋擺酒，我哋兩個可以見晒所有朋友，影結婚相就可能喺外地。」
自認是潮州大男人的馬仔被女友收服，Vivian當然有她一套，馬仔大讚道：「佢思想成熟，我又大男人脾氣，有時明係我錯，佢會忍咗唔同我嗌交，當然事後我都會認錯；佢可以獨立照顧自己，呢樣令我放心，有時我日以繼夜拍嘢照顧唔到佢，佢做生意都要一個人周圍飛，要大家互相信任體諒，同埋佢冇公主病。」
近日馬仔和前緋聞女友郭羨妮合作拍劇，劇中二人有親熱戲，馬仔指Vivian絕無詐型，他說：「佢係零干涉，如果你連我行業嘅工作態度都干涉嘅話，根本冇可能一齊。」
採訪：葉雪　攝影：陳順禎