【一代宗師】李小龍故居改建成學府 龍迷歐錦棠:總比拆咗佢好
余彭年故居歐錦棠李小龍
已故一代武術巨星李小龍,位於九龍塘金巴倫道嘅故居棲鶴小築,自李小龍去世之後,改建用作時鐘酒店。而物業業主為已故富商余彭年,佢遺囑訂明會將100億元遺產,包括上述物業,放入余彭年慈善基金作慈善用途。而基金會總裁、余彭年長孫彭志兵喺上月曾經同傳媒透露李小龍故居嘅動向,佢話會同內地嘅大學合作,將物業改為國學研究中心,不過李小龍生前最愛嘅壁畫會保留,亦都唔會變賣大宅。
身為李小龍忠實fans嘅歐錦棠今日接受電話訪問,對於偶像故居嘅最新動向,佢話都係剛從記者口中得知:「總比遷拆好啦,話晒一個私人物業,要尊重業主權利。我又唔可以話一個非商業發展啦,總之有佢自己發展,作為小龍迷如果佢能夠盡量保存原貌,咁總比好過冇。」阿棠慨歎故居原貌喺做時鐘酒店時,已經破壞好多。
阿棠舉例近停車場位置,有一幅用磁磚砌嘅外牆同水池仔,只係保留到一小部份,佢話:「其實我哋龍迷,比較着重室內。喺入面有一間龍房、龍哥嘅睡房。原本有一條直去到頂、用紙皮石砌嘅柱,已經拆咗。唯一好在嘅有兩呎左右保留係假天花入面,我哋龍迷比較貪心當然想保留番。」阿棠同時提出一個問題,作為一個學府,會唔會公開畀人參觀:「呢個係我concern(關心),如果你公開畀人入去睇下,聊勝於無啦,做得好啲,入面可以有個地方可以簡介下李小龍生平,附有圖片當然係最理想。總比拆咗佢好。」
精選娛聞,喺晒《娛果》
http://fb.com/appledailyent