三月十四日，白色情人節。過去七年以來呢個日子都同我冇太大關係，基本上就係喺工作中平平淡淡咁度過。直到今年，因為我由細識到大嘅兄弟阿晨揀咗呢日要向佢女朋友Emma求婚。為咗確保一切順利，所以我請咗日假，聯同其他兄弟預早打點好一切。但阿晨向來都係一個粗心大意嘅人，所以有錯漏都係預期之內嘅事……

「喂，克仔！十萬火急……原來我漏咗成袋香薰蠟燭喺屋企！」阿晨喺電話裡面緊張咁講：「而家仲佈置緊行唔開，你可唔可以去買上嚟酒店畀我？」

既然連假都請得，呢啲小事我當然係唔會拒絕。好快我就買齊嘢去到酒店，搭完𨋢行出走廊之後，我本來想用手機確認多次係邊間房，卻唔小心整跌咗其中一個蠟燭。見蠟燭碌到去T字轉角位停低咗，我理所當然行過去執……

「咦？」但就喺下一瞬間，竟然畀我見到走廊不遠嘅位置，有個女人踎咗喺其中一道房門側邊。

起初我仲以為佢係跌咗鎖匙，然而認真望清楚，就覺得佢比較似係偷聽緊──耳仔緊貼住大門，由於太過專注所以完全意識唔到我望緊佢。

為免情況變得尷尬，我迮迮臨執起蠟燭，然後退返入去佢見唔到嘅位置。再睇返短訊，好死唔死，要去阿晨間房就一定要喺個女仔身邊行過……睇個勢佢應該一時三刻都唔會離開，喺度齋等唔係辦法。

「唉……」我嘆咗口氣，只可以硬住頭皮行過去了。

決定好後，我先深呼吸一口氣，然後就扮作若無其事咁向前行，心裡面不斷提醒自己唔可以亂望，要當佢係透明一樣……睇佢唔到……

但人嘅好奇心總係巨大嘅，就喺我行到距離佢剩低兩三米嘅時候，我終於忍唔住瞄咗佢一眼。但只係一眼我就後悔了，因為，就好似計好咗一樣，個女人亦都喺同一時間擰轉頭望向我……

就喺我哋目光對上嘅一刻，成條走廊嘅空氣就好似瞬間凝結咗一樣。但我總算保持到鎮定，將最後一段路行埋佢。

「時間啱啱好！」阿晨打開房門見到我後，當堂鬆咗口氣，「快啲入嚟……Emma同佢班姐妹好快就會過嚟尖咀呢邊。嘩你做乜出晒汗，撞鬼呀？」

「你就撞鬼。」等佢閂埋門之後我繼續講：「外面走廊有個女人……」

「呢間酒店大把『女人』喇。」阿晨反咗個白眼，「阿Mike（另一個兄弟）都唔知係咪靠害，竟然推介我呢間酒店……希望一陣求婚嘅時候唔會有差佬嚟掃場。」

我當然知道阿晨講緊咩，據聞呢間酒店不嬲係好多男人嚟「尋歡」嘅地點。所以我頭先先要睇清楚係邊間房，摸錯門釘就唔好喇。

「克仔，你唔係喺隔離玩完先過嚟嘛？」阿晨瞇起雙眼問。

「你繼續搞你嘅佈置啦。」我將袋蠟燭隨手擺喺鞋櫃上面，「個女人踎咗喺人哋房門前面，唔知偷聽緊啲咩……」

回想返，個女人應該比我後生，無論樣定衣著打扮都似係香港人，斷估應該唔係嚟「做生意」啩？

「佢會唔會係嚟捉姦呀？」阿晨一邊整心形LED燈一邊講：「為咗搞清楚條仔係咪喺裡面先偷聽。」

「有呢個可能嘅。」我點點頭，「算喇講返你嗰筆，你一陣有冇信心先？」

「其實都冇話信唔信心啦。你都知㗎，我同Emma一早有晒共識會喺呢一兩年結婚。佢咁醒目，分分鐘已經估到我會揀今晚求婚。」阿晨回答。

「但就算係咁，你都願意為佢做咁多嘢。」我望咗眼房間嘅佈置，靚唔靚真係見仁見智，但睇得出係花咗好多心思。

「其實愛情呀，好多時都唔係講緊咩浪漫同驚喜。而係有個人願意為你許下一個承諾，然後用最大嘅努力完成佢。」阿晨帶住幸福嘅笑容講：「你呀，幾時先肯去搵返個呢？」

「你幾時變咗我老竇？」我反問，「呢啲嘢隨緣啦，要嚟嗰陣……」

「八婆，我忍夠你啦！」外面走廊突然傳嚟一把憤怒嘅男聲，打斷咗我，「一年三百六十五日每分每秒都會管住晒，我要嘅係自由呀！」

「你要自由，咁我點呀？！」另一把女聲回應：「你可唔可以還返啲青春畀我呀？！」

「嗱。」阿晨聽到都停低手，「睇嚟我估中咗喇，仲唔係捉姦？」

我聽到呢度忍唔住皺起眉頭，實在好難想像頭先個女人會有把咁低沉嘅聲音。不過聲音呢啲嘢的確係好難講嘅，正所謂古語有云：靚女多數都係老牛聲……

諗到呢度，我忍唔住透過房間貓眼望向外面走廊，本來係預咗咩都望唔到……但我錯了。呢刻，嗰個女人居然企咗喺門外面。睜大雙眼，彷彿可以睇穿木門見到我一樣……

「嘩！？」見狀，我嚇到退後幾步，最後仲失平衡向後跌落地。

「你冇嘢嘛？」阿晨即刻趕過嚟。

「個女人而家就喺外面！」我指住門口講。

「吓？」阿晨即刻行過去，望咗眼然後講：「冇呀，門外面根本冇人。聽落，嗌交嗰對男女都好似走咗……克仔，叫咗你睇少啲恐怖小說㗎啦……」

半個鐘之後，我帶住十萬個不解離開咗酒店，準備去同返其他兄弟會合。冷靜落嚟諗返，頭先我啲反應確實係有啲小題大作……

「喂。」

雖然兩次對望嘅時機都好巧妙，但嗰個女人其實又唔係真係咁恐怖嘅。

「喂，你呀。」

會唔會，其實係我潛意識唔想阿晨同Emma結婚，先至搞咁多嘢出嚟？如果係咁，我就真係一個表裡不一嘅衰人……

「喂！」

就喺我陷入深思期間，突然有人從後現身擋喺我前面……睇清楚，居然係我喺酒店見到嗰個女人！呢刻，佢用一臉難以置信嘅表情望住我，明明感到驚訝嘅人應該係我先啱。

「你……」

好快，我就知道佢個名叫做「樂尋芯」。

「……果然可以見到我。」

以上，就係我哋相遇嘅經過。

（待續）


專欄作者簡介：
有心無默
網絡作家，以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。

Facebook專頁：
https://www.facebook.com/Echo.of.Heart/