如果覺得一般商場擺棵聖誕樹嘅聖誕裝置設計太平凡，今個聖誕不妨去國際金融中心商場（ifc）睇吓，事關係佢哋請咗澳洲知名建築事務所Elenberg Fraser嘅建築設計總監Igor Kebel，喺一樓中庭搭建大型室內建築藝術裝置、高達12米嘅JINGLE BAO。
呢個JINGLE BAO天幕型嘅外殼，樓高三層，喺冇其他輔助框架支撐下凌空豎立，挑戰建築極限，市民仲可以喺入面嘅觀賞平台，欣賞由澳洲3D視覺裝置藝術大師John Kerr設計嘅5米高「聖誕燈樂機動雪山」㖭。
今日起至26號，澳洲著名專業劇場團隊Angelis Creations仲會喺高空演出結合歌藝、舞蹈同空中雜耍表演嘅精采歌舞劇《一聽鍾情》，每場25分鐘嘅視聽享受，等住大家去親身感受。