3年前因老友嫁女以嘉賓身份上台祝福的金管局總裁陳德霖（Norman），與紀惠集團行政總裁湯文亮一段逾40年「波友情」，才首度被傳媒曝光。前者是本港財金高官，後者是樓市專家，湯受訪時暢談與陳總始於南華會健身室，從不超越黃線但「交淺言深」的友誼。

湯陳二人相識於微時。湯回憶1976年從加拿大畢業回港，跟隨家姐廖湯慧靄（丈夫廖烈正為創銀創辦人廖寶珊兒子）開了間細公司從事物業投資，湯在澳門長大香港沒太多朋友，於是跟人去南華會健身操Fit下，運動時認識了中大畢業後剛入政府工作的Norman，「一返嚟無耐就識到佢，好有緣。」

「嗰時健身好悶架，個壁球場又無人用。」湯擅長羽毛球及壁球，陳精於排球及壁球，於是組隊打Squash League（香港區壁球聯賽），每年9月打到翌年3月，曾獲獎盃無數，「陳總依家仲打緊壁球，佢仲有練習我就無。」

男人的浪漫如豆腐火腩飯。湯文亮稱男人相交與女人不同，「唔駛好熱情可以淡如水...無見幾年一見猶如昨天。」相識多年，他說與陳交情「四隻字形容交淺言深」，對方掌本港財金體系，樓按加息等金融政策茲事體大，大家避嫌絕口不提否則後果嚴重；平時打完波食飯都「AA制有人管數」，湯嫁女亦是「陳總自己申請」上台祝福，防火牆加固唔會超越黃線，「同呢個老友關係好難得，值得珍惜唔應該去破壞。」

物以累聚人以群分，湯自言是物業投資者非投機者，「如果我係炒家就同佢大纜都扯唔埋一齊」。2015年他發表「細價樓爆煲論」，翌年金管局亦出招，助銀行監察供樓族借財仔二按風險。

爆煲論有否受陳逆周期思維潛移默化？湯說當時敲鐘只因擔心業主高息借財仔二按引發爆煲，兩人從不討論樓市，但長期相交不排除想法「心有靈犀」。

外界常覺陳德霖嚴肅木訥，湯笑說「我都覺得佢係嚴肅，幽默感欠奉，可能退咗休會多啲。」記憶中「唯一幽默係宣佈退休嗰次」。原來當晚收工後，陳閃了去南華會睇湯文亮等人打波。「我話全世界搵緊你，你走嚟睇波？」之後大夥去灣仔私房菜晚飯，很多食客過枱找陳影相。

「佢話我已經炒咗魷，仲搵我影相？」乜陳總炒魷咩？湯不忘補充「佢講笑啫」。即將引退，「佢一啲都無心情失落喎，反為如釋重負。」總裁位之雖高其實「唔易捱」，湯作為朋友都「覺得佢真係需要退休唞吓」。

-----------------------------
你撐蘋果 我捐$1
支援反送中抗爭者