陳小春早前帶囝囝陳胤捷（Jasper）拍《爸爸去哪兒6》，有傳今次父子檔酬勞，已經由上次2,500萬人仔，大幅升高到3,500萬人仔，即約4千萬港幣。不過，日前應采兒貼咗Jasper同爸爸一樣，攞住氧氣喺度聞嘅相，就有唔少網民心痛Jasper，事關佢今次同爸爸陳小春去嘅地方係稻城，高達海拔3,700米，有機會引發高山症。

由湖南衛視《爸爸去哪兒》推出以來，一直都吸引大批觀眾追看，後來被指過度消費明星子女，終於被廣電總局叫停，《爸爸去哪兒5》已不能在電視頻道播出。

原來廣電總局最近再度出手干預綜藝節目，上月初向各大電視台發出通知，要求電視台以兩大原則「製作傳播正能量鮮明的青少年節目」及「保護青少年身心健康」製作節目，由謝霆鋒、周杰倫、庾澄慶及李健作號召嘅《中國好聲音》，早前就因為未能達到以上兩個要求，節目一度被叫停。

《中國好聲音》於7月13日播出第一期後，上月20日本來播第二期，但官方忽然宣佈節目要延期，原來因為節目第一期，一位來自馬來西亞華裔學生蔡詠琪，只有17歲，令廣電總局非常生氣，即時叫停節目，節目最後於7月27日才能復播，蔡詠琪連帶佢參賽嗰首《Love U U》被消失。

其實蔡詠琪並非首次參加選秀，去年參加過馬來西亞《好聲音》（The Voice），殺入總決賽，其優異表現吸引咗《中國好聲音》導演組注意，主動邀請蔡參加《中國好聲音》。蔡詠琪亦曾為馬來西亞皇室獻唱。皇室都唔介意蔡詠琪未成年，唔通大陸廣電總局介意？

不過，之前亦有網民猜測，蔡詠琪鏡頭被剪，可能關乎版權問題，可能《中國好聲音》暫時未拎到林俊傑呢首歌嘅版權，所以先會被剪。總之，《中國好聲音》就係不解釋。

廣電總局其實不少都會干預節目，當日嘻哈音樂（Hip Hop）便首當其衝，廣電總局更講明不能用有紋身、Hip Hop、非主流及「頹廢文化」的藝人。

其實要電視台做乜呢？日日播央視新聞不好嗎？

精選娛聞，喺晒《娛果》
http://fb.com/appledailyent