當年今日
關於我們

  煲呔曾以退為進賭王落重注 - 李八方

蘋果日報 2005/02/18 08:00


第三屆特首廝殺戰,終於由賭王正式吹雞!賭王出席女童軍會新春團拜,見到煲呔嫂,突然失驚無神話:支持煲呔角逐特首,咁嘅人才,若然真係告老歸田,真係浪費!賭王跟住又話,畀煲呔九十分,唐唐八十八分,而當被問及梁振英做唔做得,賭王就話不予置評!
賭王講嘢,無論係棒打民主派,定係含沙影射其他地產商,一向買大開大,無寶不落!今次佢官式認可煲呔去馬,絕不尋常!
以賭王今時今日嘅國際地位,加埋有一半葡萄牙血統,由佢出面催谷煲呔,豈止係一言九鼎,重分分鐘代表埋葡萄牙政府意向!葡國係歐盟重要成員,故此,賭王叫煲呔上,隨時重係得到歐盟全體成員國幕後支持㖭!
香港下屆特首人選,輪唔輪到一名澳門首富來話晒事,咁樣會唔會傷害香港市民感情,就另作別論,不過既然賭王一響朵,咁睇嚟煲呔曾都要有心理準備,隨時接受民建聯傳召(因為老左話有意召見特首候選人逐一照肺審查),由民建聯全體常委親自面試嘞!
煲呔段數高唐唐幾班
而煲呔話「告老歸田」,呢一招以退為進,係學咗死鬼鄧小平當年伎倆!矮仔鄧一九八六年話:自己要全退,點知胡耀邦唔識死,竟然信以為真,舉手大叫「我贊成小平同志退休」,結果就咁俾老鄧監生玩謝炒魷,含冤谷到心臟病突發!
煲呔告老歸田,今時今日又有一個唐唐唔識死,竟然嗌好,重話自己在上水有幅田,叫煲呔幫手耕!睇嚟唐唐想爭住做胡耀邦都唔定喎!賭王公開畀分:煲呔九十、唐唐八十八,即是暗示面對煲呔,唐唐「九唔搭八」,同埋暗示,講到辦事能力,唐唐較煲呔差兩分!
當年袁世凱都話自己要退役,重披件漁夫竹衫,冰天雪地,作釣魚翁狀,影埋幅相,公布全國,後來咪一樣做咗洪憲皇帝?煲呔玩嘢,段數高過唐唐豈止兩分,唐唐強迫煲呔○七年之後去耕田,都幾大罪喎,到其時,唔知邊個要下放勞改呢?



傳真︰2623-9278
電郵︰[email protected]