教統局太子章頒布學制「三三四」諮詢文件。一計條數，大學讀四年，將會交多七萬幾銀學費，增加通識，又要從頭培訓原本通通唔識嘅師資，啲教師又嘮嘈，話增加負擔。
教統局強行「母語教育」，經已搞到一鑊泡，現時再次將啲細路當白老鼠，又難怪家長同學生，一致面青。教育愈改愈亂，皆因為呢個政府早已失人信任，亂搞七年，整出兩鑊7.1大遊行，中方出手輸血，嗌停唔好再癲，阿董漸漸學識咗閉目養神，得閒就放吓假，乜都唔做，白𢭃人工，就係對特區經濟嘅最大貢獻。

多幾隻黑馬重大鑊
可惜正如好多特區問題專家學者一早貼中，董欲靜而三司十一局不息。董團夥之中，有志做下屆特首嘅黑白跛馬，共有四五匹。未來兩年，中方要喺沙圈邊落足眼力揀，以便日後欽點。阿董瞌眼瞓啫，啲馬唔懶得，一定要摸黑偷跳，昂首飛蹄，畀胡溫睇清楚，自己不但冇流鼻血，重鬼咁好力水㖭。
於是各項「改革」，陸續有得出籠，而香港人喺未來兩年，有排唔得閒。呢一鑊就學制三三四，下一鋪隨時係徵收銷售稅強硬滅赤，若然遲啲傳出冬冬又係黑馬，分分鐘又輪到港九巴士站大兜亂，若然遲啲傳出，隻隻都唔係，原來胡溫睇中周一嶽喎，又輪到全港政府醫院試吓間間髹灰水，床單被袋轉過隻色，搞到連深切治療部嘅病人都個個大翻身……試問無辜市民，又經得起幾番蹂躪？