今期流行古天樂！先後攞過視帝、影帝嘅古仔，元旦日喺叱咤頒獎禮攞埋我最喜愛的男歌手，成為香港娛樂圈史上首位大滿貫，風頭一時無兩，私底下嘅古仔其實好有義氣，日前就被爆為盧海鵬代付20萬通波仔手術費，噚日就捱義氣為同是新五虎嘅古巨基宣傳part 2演唱會，以今時今日大滿貫古仔嘅身價，閒閒哋收7位數做宣傳，今次一毫子都唔收力撐基仔，認真唔話得。

將於4月喺紅館開part 2演唱會嘅基仔，在社交網po咗同古仔facetime嘅短片，古仔向基仔say hello，基仔抵死話：「請食飯呀，我最喜愛的男歌手，古仔！」古仔話：「多謝，我其實真係好鍾意唱歌，不過我係唔識唱咁解。」基仔玩變聲話：「我都真係好鍾意唱歌㗎，但係我識唱喎。」古仔笑住話：「夠啦夠啦，你識唱咪你唱囉。」基仔即唱出古仔嘅金曲《男朋友》，古仔扮無奈話：「得啦，知你威啦，我知你演唱會開Part 2，你晚晚唱飽佢，大家想睇基仔演唱會，記得早啲去撲飛啦。」

由於短片中見到基仔面紅紅，好似飲咗酒醉醉哋樣，網民留言：「古sir搞到古生好尷尬」、「你真係好似醉醉哋」、「基仔醉喇，不過紅卜卜好可愛。」

當年古仔同基仔都係大台藝員訓練班出身，95年兩人與劉愷威、吳家樂、何遠恆被力捧為新五虎，何遠恆多年前已經退出娛樂圈，劉愷威早排宣佈同楊冪離婚，吳家樂繼續留喺大台發展，去年5月基仔開騷請到佢哋同台，新五虎合唱《當年情》掀高潮，8月古仔嘅48歲生日派對上，新五虎再重聚慶祝。

當年雙古仲被張國榮公開點名力讚，o依家古仔做咗娛樂圈大滿貫，佢喺叱咤攞獎講嗰句「我真係好鍾意唱歌」，其實係出自基仔之口，03年基仔憑《必殺技》喺叱咤攞我最喜愛的歌曲獎，喺台上喊住話：「我真係好鍾意唱歌…」

精選娛聞，喺晒《娛果》
http://fb.com/appledailyent