肥龍今日，正式上任！當奴主打強政，肥龍執行勵治，今次呢副十三張，擺出個啤煙頭，「二度」嘅二司十一焗，由於中方不准換人，牌面不過係一條蛇！麻麻哋靚，只有睇吓「三度」嘅行政會議，委任嗰四個夠唔夠強，若然有強人，就變咗冇「夫」都有「花」，甚至係「小同花順」，咁未來兩年，都可以贏三注！
爵士回復英式舊制，將行政會議貶為一個「諮詢機構」，咁係好事！皆因為英治時期嘅行政局，由高等華人組成，無上權威，個個粒聲唔出，嚴守殖民地發言紀律，唔係大狀就係滙豐大班，豈知到咗阿董手上，阿貓阿狗，連工聯會人員都入得行政會議，加埋一人一把口，把口個個唔修，你一言我一語，胡亂噏乜，說三道四，權力慾倒退回心理學家佛洛依德所講嘅口腔期，一片喧嘩，搞到所謂行政會議淪為一條充滿芽菜豬油味嘅小農唐人街！

行會尊貴不再

就算撥亂反正，呢個中式「行政會議」，老實講，醫番都冇用，因為尊貴形象，一早就俾阿董敗清光！爵士繼承咗呢個山寨，都唔知點樣「改革」！港督府就好易裝修，將偽「行政會議」改番做英治時代嘅行政局，成功機會好低！
咁可以點呢？爵士或者可以參考尼克遜年代，將成個政府內閣架空，重大政策，由尼克遜拍住基辛格搞掂，根本費事理你副總統艾格紐，同埋國務卿羅傑士！呢嗱，當奴夠火氣，而肥龍就夠蠱惑，兩個拍埋，氣質互補，不但好似新馬仔同梁醒波一樣嘅夢幻喜劇組合，直頭可以做到尼克遜同基辛格嘅遠東翻版㖭！
何況明明暗暗，裏裏外外，爵士唔止咁少馬，以當奴為核心，肥龍為基地，搭番個雞棚，外有任志剛，內有中國人盧維思、牛津高材AO苗學禮、餘孽梁寶榮，軍師夏佳理等睇住，天外有天，會上有會，「行政會議」有冇都罷就，提綱挈領，實現真正港人治港，咁就似番少少樣嘞！睇吓肥龍上場，可唔可以做到港版「周身格」囉！

傳真︰2623-9278
電郵︰[email protected]