五屆意大利冠軍杜滿萊來港客串個零月，開始得非常順利，上周六贏咗隻「智勇福駿」，今期亦有七匹座騎相當多，呢位型男唔單止騎功好，仲好主動識得交際，今朝晨課空檔時完全冇喺度hea，反而走到班練馬師度打下交道。佢先後同文家良、呂健威、徐雨石、高伯新、告東尼雞啄唔斷，雖然當中禮拜三淨係有同徐雨石合作，不過杜滿萊咁醒目，當然識得搲定嚟緊禮拜日嘅合作機會。再睇番杜滿萊禮拜三騎徐雨石兩隻「野外桃源」、「金紫荊」，呢對馬季內都有過好表現，其中「野外桃源」前仗上名後，剛戰輸檔劣，今次排番個四檔，有行喇啩！