現年36歲嘅陳冠希（Edison）曾經擁有好多藝人女朋友，但正印出現了，去年有報道指Edison搭上年輕十歲嘅國產女模秦舒培，佢哋拍拖後傳出秦舒培懷孕，今年3月即爆出Edison榮升老竇，女友為佢生咗囡囡，新手爸媽一直低調，但今早終於有網友爆出Edison同秦舒培為女兒舉辦百日宴嘅相，Edison抱住囡囡，秦舒培企喺側邊，相中仲有Edison爸媽同兩個家姐，三代同堂，一臉幸福。(新聞連結： http://bit.ly/2rgUyPG )

Edison嘅舊愛黃榕，噚晚都喺社交網貼出三點式泳照，佢着住火紅泳衣曬太陽，大晒32C咪咪，黃榕o依家都有健身教練男友E先生，感情穩定，所以佢今日見到Edison做咗老竇消息，黃榕今日短訊回覆《蘋果》時話：「恭喜呀，o依家自己長大成熟咗，我都恭喜佢呀，曾經好憎佢，o依家對佢都冇咩特別感覺。」

問到黃榕點解曾經好憎Edison？佢話：「始終細個都畀佢hurt得好深，畀佢拋棄，之後唔停食回頭草，原來被玩。」黃榕同新歡E先生拍拖未夠1年，佢哋正係甜蜜蜜熱戀期，彼此仲視對方係結婚對象，大家都好認真對待呢段感情，黃榕冧爆咁話：「拍吓拖先，佢佢係全地球絕種好男人，佢份人好健康，又好錫我，我哋又有共同興趣。」黃榕雖有喺社交網貼出同男友E先生合照，但就用咗app玩變樣，因為男方想低調啲，黃榕都要保護男友。問到黃榕幾時都生BB？佢話：「我都未做人妻，順其自然，我都想結婚生仔嘅。」

另一位曾經同過Edison有過短暫情緣嘅o靚模謝芷蕙（Cammi），亦喺Ig貼出熱褲相晒長腿，原來佢同閨密去咗美國旅行，Cammi今日覆《蘋果》話：「今次男朋友冇同行，同閨密嚟玩。」當問到佢知唔知Edison同囡囡搞百日宴，Cammi立即避談。