證券經紀做生意，最重人脈，所以新正頭嘅春茗，有一半以上關佢哋事，無他，大家聯絡好感情，日後好合作。好似噚日咁，輪到香港證券商協會第27屆會董就職，揀咗跑馬地馬會開Party，重搵咗馬時亨做主禮，李業廣、周文耀、胡經昌、詹培忠、范鴻齡及梁振英等人，都有出席，場面相當熱鬧。
今日財爺公布預算案，一眾傳媒見到可能有預算案內幕貼士嘅馬局長，即刻問吓佢有乜料，馬仔一聽到呢條問題，講咗句「唔回應」，即刻掉頭想走，但又走唔甩噃，咪索性扮「聾耳陳」，乜都聽唔到。不過，華華嘅消息就話，財爺一定有糖派，就算唔減稅都有機會退稅。

財爺有機會退稅

唔講得預算，其他嘢就講得，佢話識咗新任主席李君豪好多年，加上自己對證券業界嘅事好熟，所以噚晚嘅演說會輕鬆啲，爆吓肚！另一個逢證券界酒會必到嘅范鴻齡就話，一定要親身到賀，事關佢同李主席父子識咗好多年，點忙都要嚟捧吓場。范鴻齡噚日下晝講西九，已經見過一次記者。
呢個飯局筵開15圍，有佛跳牆、東星斑，近日個市咁旺，炒兩轉H股食乜都得啦，另外仲有抽獎。講番新任主席李君豪，呢位李東海公子，係經紀都識佢。佢同華華講，阿爸阿媽同老婆都有到場幫佢打氣，所以心情好到不得了，全晚通場走招呼賓客。
李華華